TURA: East Garo Hills a·jani Rongjeng jolo donggipa Mongri Commercial Complex-o niam gri borewell kitenga ine Rongjeng-ni dingtang dingtang dolrang matnangatenba, ia biapo niam gri borewell kitaniko sal 15-ni gisepon champengatchina East Garo Hills a·jani Deputy Commissioner-na sedoataha.
Rongjeng NGO-rangni parakatani gitade, ia Mongri Commercial Complex-o niam gri borewell kitengani gimin re·anggipa 2024 bilsini June 6 tarikon, Deputy Commissioner-na badi ka·e sedoatahachim indiba da·alonan ia biapo niam gri borewell kitaniko nikna man·kuengachim.
“Batanggimin somoirango iandake borewell kitaniko National Green Tribunal (NGT)-ni gita champengate, dairangkoba ra·ahachim aro niam gri kitgipa borewell-rangko dape donpilchina official-rangna ge·etanikoba on·ahachim,” ine Rongjeng-ni bakrimgimin NGO-rang, East Garo Hills a·jani Deputy Commissioner-na sedoatgipa chittio parakataha.
Mikkangchi ia biapo niam gri borewell kitaniko sal 15-ni gisepon champengatchina aro ia borewell-ko kitenggipa mandena, niamrangko ja·rikna ge·etaniko on·china ine NGO-rang, East Garo Hills a·jani Deputy Commissioner-ko didiataha.
