TURA: Mijal February 6 aro da·al February 7 tariko salgnina Horticulture Show aro Flower Arrangement Competition-ko Tura-ni Christian Girls Higher Secondary School-o ong·atenga aro ia program-ko a·bachengatani salo, West Garo Hills a·jani Deputy Commissioner Jagdish Chelani, mongsonggipa sokgipa ong·e bak ra·angaha.
Ia program-ko a·bachengatanio, Deputy Commissioner Chelani, jinmana aganprakangengon, dingtang dingtang me·su samjak aro pulrangko ge·na gisiko nanggipa manderangna iandakgipa program-ko ong·atahani gimin Horticulture department-ko mittelpilangenba, ian me·su aro pul ge·na gisik nanggipa manderangna an·tangtangni ge·gimin bosturangko mesokna cholsan ong·aigija, sakgipinrangoniko skie ra·skana cholko on·aniba ong·enga ine parakataha.
Salgro salaram jolrango dingtang dingtang gama ge·anirangko nikna man·engani gimin janapangengon, ia jolrangni tangsekriri ong·anian ia jolrangna uko ka·sanapata ine Chelani aganaha.
Batanggimin bilsi bongani gisepo Meghalaya a·dok, State GDP-ni gita gama ge·anirangchi gipin a·dokrangna bate on·gilna man·aha ineba Deputy Commissioner aganaha.
Guerangkosan ong·aigija, gul muris, anaros aro uandakgipa ma·manti gama ge·anirangko dakchina didiangengon, ian an·tangtangnasan ong·aigija sakgipinrangnaba janggi tangani cholrangko on·na man·gen ine Chelani aganaha.
Ia program-ko ong·atani bidingo West Garo Hills a·jani District Horticulture Officer Thera Ch Marak, jinmana agan-talataniko on·angskaengon, bol wa·arangkosan ong·aigija, bolam bite, me·su samjak aro pulrangko ge·na manderangko didina aro ia jolrango gama ge·anirangko tang·doatna Tura Agri-Horticulture Society-ko 1998 bilsio bikotaha ine parakataha.
Ia program-ko ong·atanio dongpae bak ra·anggipa gipin manderangara, Tura District Horticulture Office-ni Research Officer ED Sangma, Tura Agri-Horticulture Society-ni Secretary Witterson Arengh, Agriculture-ni Joint Director B Sungoh, District Agriculture Officer Mariana Dkhar, SWGH a·jani District Agriculture Officer L Diengdoh aro gipinrang ong·a.
