SHILLONG: 2025-2026 bilsini budget-na a·dokni skanggipa pre-budget consultation-ko Budbar salo, a·dokni Chief Minister aro Finance Minister Conrad K Sangma-ni dilanichi Shillong songjinmao ong·ataha aro ia tom·anio, dingtang dingtang dilgiparang aro a·doko songdongenggipa manderangba bak ra·angtokaha.
Ia Pre-Budget consultation-ko ong·atanio, a·dokni Chief Minister, jinmana aganprakengon, budget-ko tarianio a·doko songdongenggipa manderangba bak ong·pana nanga ine janapangenba, ia budget-ara game ge·e cha·giparangna, bading chiwalgiparangna aro pilak dolrangnan ong·enga ine parakataha.
Budget-ko tarianio manderangni ku·pattianirangchi dingtanganiko ra·bana man·ani cholrang donga ine janapatengon, pilak ku·pattianirangkode changsano ra·gopna man·janaba gnang indiba mikkangchi re·mikkanganio, nangani kri pilak ku·pattianirangkon ra·na man·gen ine Chief Minister aganaha.
A·doko tangka paisani gita dal·roroaniko janapangengon, dingtang dingtang kamrangna tangka paisarangkode ma·mong sorkarioniko man·na amaia indiba maikai uarangko jakkala uosa pangchakbata ine Chief Minister aganaha.
Meghalaya a·doko economy-ni dal·roroani 16.2 percent ong·e a·songni average-nan batahaniara a·dokni dal·roroenganiko mesokanian ong·a ineba Chief Minister parakataha.
Kajinarangko gile man·ani bidingo janapatskaengon, batanggimin bilsidokni gisepo kajinarangko gile man·ani gong kror 1,450-oni kror 3,217-ona tang·doange changgni baridapaha ine Chief Minister aganaha.
Ia program-ko ong·atanio, dingtang dingtang dilgiparangni aro a·doko songdongenggipa manderangni sing·anirangna aganchakaniko on·angengon, lekka porako tang·doatna sorkarini ka·enggipa kamrangni giminba Chief Minister janapangaha.
Ia program-ko ong·atanio, Finance department-ni Commissioner & Secretary Dr Vijay Kumar D, ia bilsini budget-ko jinmana mesoke on·angskaaha.
