AMPATI: Safer Internet Day-ko maniani bak gita Budbar salo, Ministry of Electronics & Information Technology (MeitY), South West Garo Hills District Administration baksa nangrime, dingtangmancha awareness program-ko Ampati-ni DRDA Conference Hall-o ong·atangaha.
Internet-ko name jakkalani bidingo sorkari official-rangna, dingtang dingtang department-o kam ka·enggiparangna, skigiparangna aro chatro chatrirangna agan-talatanirangko on·na gita ia awareness program-ko ong·atangaha.
Ia program-ko ong·atanio, South West Garo Hills a·jani Deputy Commissioner Hema Nayak, jinmana aganprakengon, internet-ko jakkalanio dingtang dingtang namgni aro namgijanirangko talate on·angenba, internet-ko simsake jakkalchina didianirangko on·angaha.
Ia program-ko ong·atanio dongpae bak ra·anggipa gipin manderangara, SWGH a·jani Additional Deputy Commissioner R Ch Marak, ADC TK Sangma, WCR Marak, Rerapara Block-ni BDO A Ch Momin, Betasing-ni BDO CRN Sangma, Education, Agriculture, Social Welfare aro Rural Development department-rangni officer-rang ong·a.
