TURA: Meghalaya a·dokni skotong Shillong songjinmao jekai, indin UPSC coaching class-ko a·bachengataha, apsan daken West Garo Hills a·jani Selsella jolrango UPSC porikkako sena sikenggipa chadamberangnaba indin UPSC coaching class-ko a·bachengatchina Selsella jolo donggipa dingtang dingtang dolrangni nangrime bikotgipa All Selsella NGOs’ Alliance (ASNA), Meghalaya Administrative Training Institute (MATI)-ni Director-ko didiataha.
ASNA-ni chairman Harley N Sangma-ni parakatani gitade, UPSC porikkara India a·songo rakbatsranggipa porikka ong·ani gimin iandake indin coaching class-rangko on·anichi, porikka sena sikenggipa chadamberangko nambate tarisona man·achim.
“Selsella jolrango UPSC porikkako sena sikenggipa chadamberang bang·en donggenchimoba tangka paisarangni a·sel aro ramarang chel·ani gimin chel·a biaprangona re·ange coaching class-rangko ra·pana chol man·jaenga aro namnamgipa coaching class-rangko ra·pana man·jaengani a·selan UPSC porikkarango chu·sokna gita man·tokjaenga,” ine ASNA-ni chairman parakataha.
Selsella-o UPSC porikka sena sikenggipa chadamberangna indin coaching class-rangko a·bachengatchina MATI-ni Director-ko didiatengon, Selsella-o UPSC porikkana indin coaching class-rangko a·bachengatgenchimode songadam nokadamrangoni candidate-rangba jillarango gitan apsan skianirangko man·gen, cholgri ong·gipa chadamberangba coaching class-rangko ra·pana man·gen aro iandakgipa coaching class-rangara, civil service-ni kamrangna chadamberangko gisik nangbatatgen ine ASNA-ni chairman parakataha.
