SHILLONG: Ma·mong sorkarini on·enggipa railway project-ko Meghalaya a·doko ra·chakjaenga ong·ode ia kror 200 ong·gipa project-ko gimaatna nanggnok ine adita salrangna skang, a·dokni Chief Minister Conrad K Sangma parakatani ja·man a·dokona, mongsongbate Khasi-Jaintia Hills jolrangona rel gari ra·bana chanchianiko gualchina aro ia chanchianiko ianon bon·atchina Khasi Students Union (KSU), a·dok sorkariko didiatskaaha.
“Chingni nangnikanide namen rongtala aro rel project-rangko a·dok aro ma·mong sorkarirang, ianon bon·atna nangaha. Chingna Inner Line Permit (ILP)-ko ra·gate on·chengna nanga aro uni ja·mansa rel project-rangni giminde chanchina man·gen,” ine KSU-ni president Lambokstar Marngar aganaha.
ILP-ko ra·gate on·chenggijade bostu salgipa rel garirangko ra·baani giminba agangrikna man·jawa ineba KSU president parakataha.
“Niam gri napsrukanirangko champengna gita ILP-ko ra·gatchenggijade chinga rel garirangko ra·baani bidingo agangrikna man·jawa aro bostu salgipa rel gariko ra·baani giminba chinga agangrikjawa. Niam gri napsrukanirangko champengna chingna niamrangkosa nangenga, rel ramarangko nangja. Uni gimin ma·mong sorkari, ILP-ko ra·gate on·chengchina,” ine Marngar aganaha.
Gong kror 200-ni project-ko gimaataiani giminde uamang rel garirangko ra·bana on·gen ia katta ong·ja ineba ua aganaha.
Rel garirangko ra·baani bidingo cholko sandina gita dingtang dingtang dolrang baksa sorkarini agangrikna miksongenggipani gimin sing·anina aganchakaniko on·angengon, iani bidingo uamangko agangrikna okamgenchimoba uamang tom·anio bak ra·genma ra·jawa jinma chanchichenggen ine KSU president parakataha.
“Rel garirangko ra·bana gita ma·mong sorkari, a·dok sorkariko dragenchimode chingaba ILP-na draskagen,” ine Malgniang mikrakatanikoba on·angaha.
