TURA: Meghalaya a·dokni Cabinet Minister aro National People’s Party (NPP)-ni dilgipa Marcuise N Marak-ko Garo National Liberation Army (GNLA) bobil dolni manderang so·ote gala ine seahani gimin ‘The Garo Hills Times’ ingipa Facebook page-ni kosako FIR ka·doangaha.
FIR-ko a·dokni Cabinet Minister Marcuise Marak an·tangan, East Garo Hills a·jani Superintendent of Police (SP)-na ka·doangaha aro uni FIR-o janapani gitade, re·anggipa February 13 tariko, ‘The Garo Hills Times’ ingipa social media page-o, uko GNLA-ni manderang so·ote galaha aro ia kamko GNLA bobil dolni manderang an·tangtangan a·kangaha ine seahachim.
“Iandake tol·gipa koborrangko seaniara, manderangni gisepo kenjagokaniko, dilsretna jotton ka·aniko aro so·sojengjeng ong·aniko ra·bana jotton ka·aniko mesokanisa ong·a,” ine Marak, SP-na badi ka·doanggipao parakataha.
“Iandake tol·gipa koborrangko seaniara, manderangni naljokanio kenchakna nanganikoba ong·ata aro iandakgipa kamrangko raken champengna nanga,” ineba Cabinet Minister, FIR-o janapataha.
Iani bidingo ta·raken sandirokanirangko dakchina aro ia tol·gipa koborko gipatanio jak donggipa manderangni kosako rakgipa ja·kurangko de·china gitaba Marak, East Garo Hills a·jani SP-ko didiataha.
Uni FIR baksana Marak, tol·e segipa koborkoba sakkina on·chapataha aro mikkangchi iandakgipa kamrangko ka·taijana gita rakgipa ja·kurangko de·china SP-ko didiataha.
