ANVC dolrang baksa songgigrikaniko chu·sokatchipjaenga ine Tura MDC matnanga

TURA: 2014 bilsio A·chik National Volunteers Council (ANVC) dolrang baksa a·dok aro ma·mong sorkarirangni songgigrikaniko chu·sokatchipkujaengani gimin Tura-ni MDC aro Bharatiya Janata Party (BJP)-ni state vice president Bernard N Marak, ia songgrikaniko dakdilgipa aro gitcham Union Home Minister Rajnath Singh-ko New Delhi-o grongenba, badi ka·doangaha.
Tura-ni MDC Bernard N Marak-ba ANVC-B-ni chairman ong·e, ia songgigrikanio soi ka·giparangoni saksa ong·achim ine nikna man·a.
Marak-ni parakatani gitade, ANVC dolrang baksa songgigrikaniko ma·mongni gitcham Congress sorkari, bilsi 10 batpile soi ka·chipjahaoba 2014 bilsio BJP sorkariko rikani ja·man jadokni gisepon ANVC dolrang baksa soi ka·grikahachim.
“Ua somoio Congress sorkari, miksongmanchaen ia songgigrikaniko chu·sokatchipgija donaha aro da·o NPP sorkariba, Congress sorkari gitan ia songgigrikaniko chu·sokatchipgija donenga. Ia songgigrikaniara, Sixth Schedule-ko taridapanichi Autonomous District Council (ADC)-rangko mangrakbatatna miksonganisa ong·engachim indiba ia party-rangara, Tribal-rangni kosako re·gipa party-rangsa ong·e, ia songgigrikaniko chu·sokatchipkujaenga,” ine Marak parakataha.
BJP dol, jatni bimangrangko, jatni daka rikanirangko, aro ma·mongni tangka paisarangko man·bae on·na jotton ka·enga indiba Congress aro NPP-ni dilgiparang, BJP sorkari baksa songgigrikaniko nisie galaha ineba Tura MDC matnangataha.
Ia songgigrikaniko 2014 bilsion soi ka·grikahachim indiba 2025 bilsionan ADC-rangona bang·e dingtanganirang sokbakujaenga ine janapatengon, ia bilsi 10-ni gisepo ge 13 department-rangko ADC-rangna pakwate on·kuja, tangka paisani gita dakchakanirang dongja aro batanggimin bilsi bongani gisepo changsaba iani bidingo tom·aniko ong·ata dongkuja ine Marak parakataha.
“Ia songgigrikani namgnirangko a·dok sorkarisa jako ra·e, tangka paisarangko a·dokni department-rangnasa jakkalskaenga. Ia songgigrikanio soi ka·grikani ja·man ADC-rang, special package-rangko man·na a·bachengahachim indiba sorkariko chalaienggipa party-sa, an·tangtangni contractor-rangch tangka paisarangko jakkalsretaha aro ADC-rangde, Utilisation Certificate-rangkoba on·na man·jaha,” ine BJP-ni state vice president parakataha.