SHILLONG: Meghalaya a·doko Trinamool Congress (TMC)-na kamko ka·enggipa manderang, maming ka·donganiko nikjae, ka·sinsin ong·katgrimtokengahani gimin bang·e tangbangjawaha ine Robibar salo, Mendipathar MLA aro National People’s Party (NPP)-ni dilgipa Marthon J Sangma parakataha.
“Meghalaya a·doko TMC-de bang·e tangbangjawaha maina TMC-na kamko ka·enggipa manderang, election-rango cheani cholrang donggijaniko niken, party-oni ong·katgrime kattokengaha,” ine Sangma aganaha.
Congress dolni ning·o Dr Mukul Sangma aro Vincent Pala-ni bilna sekgrikani a·selan Congress dolni be·gruanganiko ua an·tangan mikrongtangchi nikahani gimin party-rang be·gruangani somoio mai dake nika ua an·tangan cha·tote nimanaha ineba Sangma aganaha.
Congress dolni mitam MLA-rang TMC-o napangaha indiba mitam dilgiparang, ia be·grugimin party-o dongrikaha ineba Mendipathar MLA aganaha.
Sangma-ni parakatani gitade, uni NPP baksa bakrimanian una nambatgipa ong·aha maina uni NPP-o napanichi, ua dingtang dingtang namroro silroroani project-rangko an·tangni constituency-ona man·bae on·na man·aha.
A·dokni Chief Minister Conrad K Sangma-ko mittelpilangskaengon, ua saksa mangkimgipa aro niksamsoani donggipa dilgipa ong·e, Meghalaya a·dokko namroro silroroaniona ra·angna man·engaha ine Sangma aganaha.
Ua Congress baksa maming bak dongjaha aro NPP baksasa ong·angaignok ineba NPP-ni MLA Marthon Sangma parakataha.
Congress dolko napsrimangenggipa jahas ine janapatengon, Congress dolni ning·o meligrikgijanirang dongsimani a·selan sakdok gitcham cabinet minister-rangko man·chape bang·bata MLA-rangan NPP-chi dilenggipa MDA sorkario bak ong·tokaha ine Sangma parakataha.
Prestone Tynsong, Ampareen Lyngdoh aro AT Mondal pilakan da·o NPP-o naptokahaoba uamang baksa tom·anirango asongode ua an·tangko Congress dolo gitan daknikkuenga ineba Sangma aganaha.