SHILLONG: University of Science & Technology Meghalaya (USTM)-o poraienggipa chatro chatrirangna tol·gipa certificate aro degree-rangko on·e manderangko cha·bokenga ine Assam a·dokni Chief Minister Himanta Biswa Sarma matnangatani ja·man, iani bidingo kakketko ma·sina man·na gita judicial inquiry-ko dakchina Meghalaya a·dokni Bharatiya Janata Party (BJP) dabiangaha.
USTM-ni kosako matnanganiara kakket ong·ama ong·ja, uko ma·sina man·na gita Meghalaya sorkari, iani bidingo judicial inquiry-ko dakatna nanga ine Sombar salo, BJP-ni state general secretary Wankitbok Pohshna dabiangaha.
“Ia chang USTM-ni kosako matnanganiara namen gisiko nangna nanggipa kam ong·enga aro iani bidingo jakgitel ong·gipa agency ba bimangchi sandirokna nangchongmotenga. Tol·gipa certificate aro degree-ko on·enga ine chanchichipaniba chatro chatrirangna dal·bea nangchakeaniko ra·bana man·a. Uni gimin iani bidingo kakketko ma·sina gita sandirokaniko a·bachengataniara a·dok sorkarini daitoan ong·a,” ine Pohshna aganaha.
Jeba matnanganirangkode dakna man·aia ine ku·rachakangengon, ia matnanganiko songsul a·dokni Chief Minister-sa ra·baahani gimin ian jajrengna nanganiba ong·enga ine BJP-ni dilgipa parakataha.
USTM-ni degree-rangko Assam-o sorkari recognize ka·jana agangipani bidingo janapatskaengon, ian ia University-o poraie matchotanggipa bang·a chatro chatrirangnan nangchakeaniko ra·bagen, uni gimin official-ni gita u·iatanina senggijan Meghalaya sorkari, iani bidingo judicial inquiry-ko dakatna nangchongmota ine Pohshna dabiangaha.
