TURA: Garo Hills Autonomous District Council (GHADC)-ni ning·o donggipa mouza 5-oni mouza 10-ona a·a pattarangko on·aniara niamni a·palo ong·enga ine Tura-ni social activist Flaming B Marak parakatenba, ia mouza-rangko ra·galpilchina GHADC-ni dilgiparangko didiataha.
Iani bidingo Marak, GHADC-ni Chief Executive Membor (CEM) aro Executive Membor (EM)-na dingtang dingtang chittirangkoba sedoataha.
“Mouza V-oni mouza 10-ona ga·akgipa biaprangnaba a·a pattarangko on·na gita bil donga ine a·kangenba GHADC, dingtang dingtang sorkari department-rangna, corporation-rangna, company-rangna aro manderangnaba a·a pattarangko on·enga. Indiba ian niamni a·palo ong·a aro ia janapgimin mouza-rangko ra·galpilna nangchongmota,” ine Flaming Marak, GHADC-ni CEM aro EM-na sedoatgipa chittio janapataha.
GHADC-ko a·bachengaonin Garo Hills-o mouza brisan dongaia ine janapatengon, GHADC-ni ning·o gipin mouza-rangko ra·dapna ba chalaina bil dongja ine Marak a·kangataha.
