GUWAHATI: Assam Police-ni Special Task Force (STF), University of Science and Technology Meghalaya (USTM)ni chancellor Mahbubul Hoque-ko Sonibar pringo uni dongchakgipa nokoniko rim·aha. Patharkandi-o Hoque-ni bikotgipa school jekon Education Research and Development Foundation (ERDO Group-chi chalagipa ong·a ua school-o CBSE Class 12 exam ba porikkao tik ong·gija ba cha·bokani mamlako rim·aha.
Indiba ERD Group, aro police iani bidingo mamingkon agana dongkujaenga.
Koborni gita, porikkao tik ong·gijaniko Sribhumi-o mamla segataha, indake sandia matchotkujaenga.
Assam Education minister Ranoj Pegu-ko ia mamlako ta·raken aro name dake am·sandichina dabiaha.
“Patharkandi Central Public School-o poraigipa student-rangna Class 12 CBSE porikkao MCQ section-o mark 30-ko dakchakna ka·dongataha. Mark-ko on·na mik-songanio mongsongbate Goalpara-oni bang·batakon uno donataha ine Pegu social media gita parakaha.
“Porikka seako nitimgipa invigilator-ni ra·chakna jechakani ja·man so·sojengjeng ong·aha. Teacher ba skigiparangko room ning·ao tala tekchangaha, iana police nirokna sokangaha. Iandakgipa obostako name dake sandina nanga ine education minister aganaha.
Minggipin adita salrang skangsan Assam-ni Chief Minister Himanta Biswa Sarma, USTM-ko cha·bokgipa ine matnangaha.
Iarangni gisepon Congress-ni a·gipi dilgipa Ripun Bora, USTM-ni chancellor Haque-ko rim·aniko raken jegalataha. Batanggimin adita salrangonin Assam CM Sarma, Mr. Haque-ko dingtang dingtang bidingrango matnangenga ine Bora aganaha. Haque-ko ong·gija kamrangchi ba bewalrangchi student-rangna mark-ko on·dapna mikbokata ine matnangaha. Minggipin Haque-ko meja bilsiosan uni OBC certificate-ni gimin matnangaha. Bilsi 1990-o Sribhumi district-oniko togie Haque, OBC certificate-ko ra·aha ine matnangaha.
