SHILLONG: Jaintia Hills Autonomous District Council (JHADC) election-o National People’s Party (NPP), dam 13 seat-rangko chee bang·bate chegipa dol ong·ahani gimin apsan bakrimenggipa dolrang baksa JHADC-ni gital Executive Committee (EC)-ko rikna tik ka·angaha.
Khasi Hills Autonomous District Council (KHADC) election-ode NPP, seat dambrikosan chena man·aiahani gimin Opposition dol ong·e kam ka·skana tik ka·angaha.
Iani bidingo kobor ra·timgipa manderang baksa agangrikengon, JHADC election-o gimik dam 29 constituency-oni dam 13 seat-rangko chee, bang·bate seat-rangko chegipa party ong·ahani gimin apsan bakrime kam ka·na sikenggipa dolrang baksa JHADC-ni gital EC-ko rikna miksongenga ine NPP-ni ku·wattimgipa Himalaya Shangpliang parakataha.
“JHADC-o chinga dam 29 seat-rangoni dam 13 seat-rangko cheaha aro JHADC election-o bang·bate seat-rangko chegipa dol ong·e, apsan bakrime kam ka·na sikenggipa dolrang baksa gital Executive Committee-ko rikna miksongenga,” ine Shangpliang aganaha.
Apsan bakrimna sienggipa dolrangni gimin sing·on da·o dipet iani bidingo chanchirima dongkuja indiba MDA-o apsan bakrimgipa dolrang dongani gimin JHADC-ni EC-ko rikanio NPP baksa bakrimgipa dolrang dongaigen ine Shangpliang parakataha.
JHADC-ni gimik dam 29 constituency-oni dam 13-ko NPP, dam 8-ko VPP, dam 3-ko Congress, dam 3-ko UDP aro seat damgniko Independent candidate-rang cheahachim ine nikna man·a.
JHADC election-o NPP-ni candidate-rangko seokahani gimin NPP-ni dilgipa, Jaintia Hills-ni manderangkoba mittelpilataha.
KHADC election-o seat dambrikosan chena man·aiahani gimin janapatskaengon, “Chinga KHADC-ni dam 25 constituency-rango candidate-rangko susaatahachim indiba constituency dambriosan chu·sokna man·aiaha. Uni gimin re·baenggipa salrango chinga chu·sokgijani a·selko ia constituency damantionikon sandina jotton ka·gen,” ine Shangpliang aganenba, je biaprangon uamang chu·sokna man·jahachim, ua biaprango party-ko bilakbatatna kam ka·gen ine parakataha.
“Manderangni namnike seokaniko chinga mande ra·a aro chinga NPP-ni gita manderangna dangdike on·nasa kamko ka·enga ine u·iatna ska. KHADC-ni pilak constituency-rango donggipa manderangkoba anga party-ni pal mittelpilna ska,” ine ua aganaha.
KHADC-o NPP, apsan bakrimenggipa dolrang baksa Opposition dol ong·e asonggen aro manderangna dangdike on·angskagen ineba Shangpliang parakataha.
KHADC-ni election-ara, sorkarini kosako pu·onani ong·ja ineba ua a·kangataha.
