TURA: Tura-ko Winter Capital songchina dabienggipani bidingo manderangna talatanirangko on·na gita A·chik State People’s Front (ASPF)-ni gnigipa awareness campaign-ko Sonibar salo, South West Garo Hills a·jani Garobadha Merong Bazar-o ong·atangaha.
Ia awareness program-ko ASPF, Garoland State Movement Committee (GSMC) baksa nangrime ong·ataha aro ia program-ko ong·atanio Garobadha-ni FKJGP, APA, NGCO aro dingtang dingtang dolrang baksana songni nokni Nokmarangba bak ra·angtokaha.
Ia program-ko ong·atanio, FKJGP Garobadha circle-ni president Anderson M Marak, jinmana aganprakengon, Tura-ko Winter Capital songaniara Meghalaya a·dokko man·e on·dilanggipa pagitchamrangni ku·rachakgimin kattarangan ong·a ine iako chu·sokatchina a·dok sorkariko didiangaha.
APA Garobadha unit-ni president Willat Ch Marak-na jinmana aganprakengon, Tura-ko Winter Capital songchina dabianiko chu·sokatkujaskal ia dabianio bakrimna ku·rachakaniko on·angskaaha.
Ia tom·anio GSMC-ni acting chairman Balkarin Marak-ba jinmana aganprakangengon, Tura-ko Winter Capital songchina dabianirang chu·sokkujaskal uamangni dabianiko dontongjawa ine ia dabianio pilakkon bakrimchina didiangaha.
Ia awareness program-ko ong·atanio, ASPF-ni secretary Bernita Marak-ba jinmana aganprakengon, Garo Hills-o songdongenggipa manderangni namgnina Tura-ko Winter Capital songchina dabianio bakrimaniko on·china Garo Hills-ni pilak MLA aro MDC-rangkoba didiataha.
“An·tangtangni nanganirangko chu·sokate on·chinasa Garo Hills-ni manderang, na·simangko seokaha aro iani bidingo Assembly-o ku·rang on·aniara na·simangni daitoan ong·a,” ine Marak, Garo Hills-ni MLA-rangko didiataha.
Bon·kamao Sonamite songni Nokma Agasi Sangma-chi Isolo bi·e ia tom·aniko matchotataha.
