SHILLONG: National Medical Commission (NMC)-ni ra·chakaniko man·ahaon, Shillong Medical College-ni skanggipa batch-ko ia bilsionin a·bachengatgnok ine Sombar salo, a·dokni Health Minister Ampareen Lyngdoh, Assembly-o parakataha.
A·doko medical education-ko on·anio mangrakbatatna aro sanna banani kamrangko nambatatna gita ia Shillong Medical College-ko sorkari jako ra·e chalaigen ineba Health Minister parakataha.
“NMC-ni ra·chakaniko man·ahaon Shillong Medical College-ni skanggipa batch-ko ia bilsionin a·bachengatna gita pilak nanga ja·kurangko de·samsoengaha,” ine Lyngdoh aganaha.
Assembly-ni Budget Session-o medical college-rangko chalaiani bidingo Opposition dolni dilgipa Mukul Sangma-ni sing·anina Health Minister, ia kattarangko aganchakaha.
A·dokni medical college-rangko kuliani bidingo sing·doangengon, Shillong Medical College-ko ia bilsionin sorkari chalaina miksongengoba da·onan mai obosta ong·enga uarangko talata dongkuja ine Mukul Sangma aganahachim.
Iana aganchakaniko on·angengon, Shillong Medical College-ko a·bachengatna gita Health department, kamrangko ka·engaha ine Lyngdoh aganaha.
“Shillong Medical College-ko a·bachengatna chinga North Eastern Hill University (NEHU)-o bak ong·atmanaha,” ine ua aganaha.
Pasteur Hills-ko Academic Block dake tariskaaha ineba Health Minister parakataha.
“Ian brown field project ong·ani gimin chinga gital hospital-rangko kulina gita nangjaenga aro je donggiparangkon jakkalna man·enga. Kam ka·giparangkoba chinga hospital-rango ka·soenggiparangkon jakkalna miksongenga. Da·o basako NMC iarangko nina re·bagen, ukosa chinga da·o nisengenga,” ine Lyngdoh aganaha.
