SHILLONG: Byrnihat-o industrial estate-na a·dok sorkarini ra·gipa a·arangara kanggimin buring bolgrimrang ong·ja ine Bristibar salo, a·dokni Chief Minister Conrad K Sangma, Assembly-o talataniko on·angaha.
Assembly-o Mawryngkneng MLA Heavingstone Kharpran-ni sing·anirangna aganchakaniko on·angengon, “Manderangni ma·sisretenggipa mingsa kattako anga talatna sikenga. Byrnihat-o industrial estate dakna sorkarini ra·gipa acre 137 a·arangara, reserved forest ba kanggimin buring bolgrim ine see rakkigipa biaprang ong·ja,” ine Sangma aganaha.
Ia a·arangko da·alo ra·e knalni gisepon karkanarangko kuligen ia katta ong·ja ineba ua aganaha.
“Da·o dipet ia a·arangko soil & water department aro horticulture department-oniko sorkariona ra·jitanichisa kamko a·bachengkuaigen aro una agrede mamingba dongkujawa,” ine Chief Minister aganenba, da·o dipet ia biapo horticulture-ni kamrangko ka·engani gimin aro maiba training program-ko ong·atengani giminsa sorkariko iako dakengkua ine parakataha.
Sorkarina on·enggipa a·arangni pal, Soil & Water Conservation aro Horticulture department-rangna dingtang dingtang a·arangko on·skagen ineba Chief Minister parakataha.
“Ia biapni dal·aniara hajal acre ong·gipa biap ong·ja indiba acre 137 ong·gipa a·arangsan ong·aia aro ianoni acre 127-de soil department-ni aro acre 10-de horticulture department-ni ong·a. Ia a·ani 55.9 percent-de nosto ong·gimin a·arangsa ong·a,” ine Sangma aganaha.
Ia biaprangara, karkanarangan gapgipa biap ong·ani giminsa iako state-of-the-art industrial estate dakna sorkari miksongenga ineba Chief Minister talataniko on·angaha.
“Ia biapko state-of-the-art industrial estate dakna miksonganisan ong·aia aro iano environmental ba samtangtango ong·telaigiparangko ripingna dongimin niamrangko pe·na miksongani katta dongja,” ine ua aganaha.
Mikkangchi je kamrangko ka·genchimoba sorkari, Environmental Impact Assessment (EIA)-ko dakchenggen aro pilak niamrangkon ja·rikgen ineba Chief Minister ku·rachakaniko on·angaha.
Meghalaya Investment Promotion Agency (MIPA)-ko ra·gatanio Land Transfer Act-ko pe·e private company-rangna a·arangko on·na kenchaktokenggipani bidingo talataniko on·angskaengon, Land Transfer Act-ara skangonin a·dokni manderangko chel·chakgipa niam ong·e Meghalaya a·dokna namen gamchatbegipa niam ong·a aro iako sorkari maming dakeba pe·na miksongani dongja ine Chief Minister talataniko on·angaha.
“Ia project-ara sorkarini skani gitasa ong·engoba ia kamo chinga a·dokni manderangkoba bak ong·atenga aro ia project-ni namgnirangkoba chinga manderangna mesokgen. Chinga manderangna dangdike on·nasa re·baahani gimin maming kamrangon chinga dakdrana nangani katta dongjawa,” ine Chief Minister aganaha.
