SHILLONG: Baljek Airport-ko chalaina gita a·dok sorkari, Airports Authority of India (AAI) baksa agangrikanirang matchotangengahani gimin re·baenggipa 2026 bilsi dipetde, ia airport-o ge 19 ba ge 20 seat-rang donggipa sildorengrangchi chalaina man·naba dongaha ine Sukrobar salo, a·dokni Chief Minister Conrad K Sangma, Assembly-o parakataha.
Baljek Airport-ko ru·uta bilsirangna chalaichipgija donengani gimin aro Umroi Airport-ko dal·batatanio somoirang nangengani gimin dingtang dingtang Opposition membor-rangni sing·anina Chief Minister, iako aganchakaha.
“Chinga Umroi Airport-ko dal·batatna aro Baljek Airport-ko a·bachengatna rakbee kamrangko ka·enga,” ine Chief Minister, Assembly-ni question hour-o aganaha.
“Chingni AAI baksa agangrikani da·o bon·kamgipa gadangona sokengaha aro 2026 bilsionide Baljek Airport-oni sildorerangrangko watna ka·dongenga,” ineba ua aganaha.
Umroi Airport-o ong·enggipa obosta gita Baljek Airport-nade ong·jana gita Baljek Airport-ni runway-ko bakrodapatna sorkari miksonganirang dongama ine Nongthymmai-ni TMC MLA Charles Pyngrope-ni sing·anina aganchakaniko on·angengon, ua an·tangan iani bidingo ma·mongni minister-rang baksa agangrikna jotton ka·enga indiba korosrang aro cholrang bang·e dongkujani gimin Baljek Airport-o ge 19 ba ge 20 seat-rang donggipa sildorerangrangchi a·bachengna sorkari miksongenga ine Chief Minister parakataha.
Iana skang, Baljek Airport-ko 2008 bilsio oprakanio bilsi 17-na chalaichipgija donengani gimin Dadenggre-ni TMC MLA Rupa Marak-ni sing·anina aganchakaniko on·angengon, da·o dipet Baljek Airport-ko chalaina man·kujaenga indiba ia airport-o ge 19 ba ge 20 seat-rang donggipa sildorengrangko bilruraatna sorkari, AAI baksa agangrikenga ine a·dokni Deputy Chief Minister aro Transport Minister Sniawbhalang Dhar parakataha.
Airport-ko taridapna aro dal·batatna gita acre 211.13 a·arang donga ine janapatengon, ia airport-na a·arangko ra·anio da·o dipet gong 3,57,97,775 koros ong·aha ine Transport Minister parakataha.
