TURA: March 11 tarikoni 19 tarikona Dadenggre Civil Sub-Division-ni ning·o donggipa dingtang dingtang songrangni gisepo dingtang dingtang susaanirangko, ‘Bakrim 2025’ ine bimingko donenba, Dadenggre kal·chakramo ong·atenga ine Dadenggre Civil Sub-Division-ni Sub-Divisional Officer (Civil) C Awasthi u·iataha.
Ia program-ko ong·atani bidingo talate on·atengon, “Ia Bakrim 2025-ara dingtang dingtang songrangni gisepo susagrikanisan ong·aija indiba namroro silroroani, ku·mong nangrimani aro Dadenggre Block-o namroro silroroaniko manianiba ong·enga,” ine Dadenggre SDO parakataha.
Ia program-ko ong·atani miksonganiara, ma·mong sorkarini dingtang dingtang scheme-rang, jekai MGNREGA, PMAY, Health department-ni Ayushman Bharat, Agriculture-ni PM Kisan, PM Vishwakarma aro uandakgipa scheme-rangni bidingo manderangna u·iatna aro ia scheme-rango bimingrangko segate sorkarini namgnirangko on·anian ong·enga ineba SDO aganaha.
Ia Bakrim 2025-o Best Village Award, dingtang dingtang boksisrang aro gong 1,00,000-ona kingking boksisrang donga ineba Awasthi parakataha.
Ia Bakrim 2025-o pakmao salsusaani, budu salgrikani, Volleyball kal·susaani, doka dam·ani aro chrokani, wata chengani, sika koani, me·su samjakrangko mesoksusaani, cha·ani ringani aro uandakgipa program-rangba donggen ine SDO parakataha.
Una agreba ia Bakrim 2025-o, nambatgipa VEC, nambatgipa VHC, nambatgipa SHG, rongtalbatsranggipa song, nambatgipa PMAY nok aro uandakgipa award-rangba donggen ine u·iataha.
