SHILLONG: Tura-ko Winter Capital songchina dabianiko jegalenga ine YouTube social media-o an·tangko matnangahani gimin mande sakgnini kosako, Meghalaya Assembly-ni Deputy Speaker aro Resubelpara-ni NPP MLA Timothy D Shira, Shillong-o donggipa Chief Judicial Magistrate-ni kachario, ‘defamation case’ ka·angaha.
Ia ‘defamation case’-ko ua, Assam Goalpara a·jao donggipa Daranggiri songni Mikkanchi R Sangma aro North Garo Hills a·jao donggipa Thapa Darenchi songni Balsrang Marak minggipa manderangni kosako ka·angaha.
Iani bidingo kobor ra·timgipa manderang baksa agangrikengon, “Tura-ko Winter Capital songani bidingo angni Assembly-o agananiko uamang YouTube social media-o tol·e matnangahani gimin anga mande sakgnini kosako mokordoma ka·aha,” ine Shira parakataha.
“Assembly-o angni agananiko uamang name ma·sichenggija, anga jattangni kosako chakatenga aro Tura-ko Winter Capital songchina dabianiko jegalenga ine YouTube social media-o matnangahani gimin anga ia mande sakgnini kosako defamation case ka·aha,” ineba Assembly-ni Deputy Speaker aganaha.
Iani bidingo Deputy Speaker-ni ukilba kobor ra·timgipa manderang baksa agangrikengon, “Da·alo chinga ia mande sakgnini kosako ‘defamation’ aro ‘criminal defamation’ case-rangko ka·aha. Criminal defamation-ode ia manderang, an·tangtangni matnanganirangna sakkirangko mesoke on·na man·jaon niamo pangchake sastirangko man·na ama aro uamang Deputy Speaker-ni Assembly-o agananiko ong·gija dake aganskaahani gimin uamang sakgnini kosakon gong kror 100-prakni defamation case-koba ka·aha,” ine parakataha.
Adita salrangna skang, Assembly-ni budget session-o Tura-ko Winter Capital songchina dabienggipani bidingo chanchirimna gita Opposition dolni dilgipa Mukul Sangma, Assembly-ona ra·baon, Meghalaya a·dokko man·aoni bilsi 53 gapanio changsaba Opposition-ni ra·bagipa resolution-ko Assembly-o pass ka·a dongkuja ine Chief Minister Conrad K Sangma-ni aganani ja·man MLA-rangoni bang·batan ia resolution-o bakrimaniko on·na jechaktokahachim.
Iani bidingo Assembly-ni Deputy Speaker aro Garo Hills-oni saksa ja·delbatsranggipa MLA Timothy D Shira-ba janapatengon, Tura-ko Winter Capital songna chanchianiara namen nama indiba ua iana political-ni gitade chakpaaniko on·na man·jawa ine aganahachim.
A·bachengonin Tura-o Winter Session-ko ong·atna chanchianisa donga indiba Tura-ko Winter Capital songna miksonganide dongja ineba Shira aganahachim.