SHILLONG: Shillong Airport-ko dal·batatna gita kamrangko jako ra·e ka·engahani gimin Science & Technology-ni Union Minister of State (Independent Charge) Jitendra Singh, an·tangni kusi ong·aniko parakataha.
2014 bilsionin an·tangni gitcham DoNER Minister ong·e bilsisnina kam ka·aniko gisik ra·atpilengon, ua somoirango Shillong airport-ko dal·batatna gita man·chipkujaengachim aro iani mongsonggipa a·selara ia jolrangni a·briarigipa biap ong·ani gimin ong·achim ine Singh aganaha.
Singh-ni aganani gitade, British-rangni somoionin aro a·songni jakgitelaniko man·ani ja·manba Shillong-ara Assam-ni skotong songjinma ong·ani gimin ia biapo namgipa airport-ko nangchongmotenga.
Skangonin Shillong-o helicopter-rangchi mande salruraaniko nangniktokengachim ineba Union Minister of State Jitendra Singh aganaha.
Meghalaya sorkari, ma·mongo Narendra Modi-chi dilenggipa sorkarini pilak nanga dakchakanirangko man·enga ine janapatengon, ia sorkarini somoion Meghalaya a·doko rel garirangkoba a·bachengna nangenga ine Singh parakataha.
A·songni Prime Minister Narendra Modi, chang 65-na baten salgro salaram jolrangona re·baahani gimin gitcham Prime Minister-rangna bate ia jolona re·babatgipa PM ong·aha aro ian uni salgro salaram jolrango namroro silroroaniko ra·bana nangnikenganiko mesokani ong·a ineba Singh aganaha.
“Salgro salaram jol gimikkon da·o Modi sorkarini namroro silroroatanio model gita ra·engaha. Ia jolrango da·o pilakni gitan dingtanganiko nikna man·engaha aro 2014 bilsina skang iarangko nikgipasa iakode ma·sibata,” ine ua aganaha.