TURA: West Garo Hills a·jani a·kawe jolrango donggipa petrol pump-rangko seng·gnang chiprongengani a·sel kam nangchongmotana songre songgabatna nanggipa manderang neng·nikanirangko chagrongna nangtokenga ine All Meghalaya Minority Students Union (AMMSU) parakatenba, ia jolrango donggipa petrol pump-rangni somoiko bariatchina gita didie Dadenggre Civil Sub-Division-ni Sub-Divisional Officer (Civil)-na sedoataha.
AMMSU-ni parakatani gitade, West Garo Hills a·jani a·kawe jolrango donggipa petrol pump-rangko attam 7:00 bajirangon chipengani a·sel jolo songdongenggipa manderang, mongsongbate kam nangana songre songgabatna nangenggipa manderang neng·nikanirangko chagrongna nangtokengachim.
Petrol pump-rangko seng·gnang chiprongani a·selan sagipa manderangko hospital-rangchi salrurana nangani somoirangoba neng·nikanirangko chagrongna nangenga ine janapatengon, pilakni namgninan ia jolo donggipa petrol pump-rangko komibeoba walni 10:00 bajimangona kulina nanga ine AMMSU didiataha.
Ia jolrango donggipa bang·bata petrol pump-rangon ringani chi, gari chakkana balwa on·gipa aro toilet-rang dongjani a·sel manderang neng·nikanirangko chagrongna nangronga ineba AMMSU parakataha aro ia petrol pump-rango manderangni nangchongmotgipa cholrangko on·china didiataha.
“Songre songgabatgipa manderangna service station-rango pangnan ringani chi, gari chakana balwa aro a·pal re·ani cholrangkode on·na nanga,” ine AMMSU didiataha.
