MENDIPATHAR: Re·anggipa Sonibar attamo, North Garo Hills a·jani Mendima Karabalapara songo, nok te·sako bon·pile wa·al kamaha.
Kobor on·timgiparangni u·iatani gitade, ia nokara, Eping Sangma aro Grethaline G Momin-ni nok ong·achim aro ia a·sel ong·ani somoio uamang nokgimikan bazaar koros ka·na re·angahachim.
Attamni 6:30 bajimang nokgiparang jiksesa, an·tangtangni demechik sakbongako rime koros ka·na re·angaha aro uandaken attamni 7:30 bajimango uamang koros ka·e re·bapilon, noko wa·al kamakosa uamang nikeaha.
Wa·al kamako nikeon, uamang noksulrangko dakchakchina okamataha indiba uamangni nokko chu·gimik kamsomanahani gimin mamingkoba daksrapjaha ine kobor on·timgiparang u·iataha.
Ia noko tangka paisa aro ma·manti gamchatgipa bosturang dongachim aro ia gimikkon wa·al kamgoptokaha.
Iani bidingo nok nokgiparang, Robibar pringo, Kharkutta Police Station-o badi ka·eaha aro police-rang, ia nokko wa·al kamani bidingo am·sandina a·bachengataha ine kobor on·aha.
Ia nokko wa·al kamanio komibeoba gong 1,50,000-mangni gita noksan ong·atako man·aha ineba kobor on·timgiparang u·iataha.
