SHILLONG: Salgro salaram a·dokrangko bak dakna jotton ka·a ine Lok Sabha-ni gitcham Speaker aro gitcham Union Minister PA Sangma sagiko matnangahani gimin Manipur a·dokni gitcham Chief Minister N Biren Singh-ko National People’s Party (NPP) jegalatenba, iani bidingo kema bi·china dabiangaha.
Iani bidingo kobor ra·timgipa manderang baksa agangrikengon, PA Sangma gita dakgipa dilgipako matnanganiara ra·chakna man·gijani ong·a ine NPP-ni dilgipa aro a·dokni Cabinet Minister Marcuise N Marak parakatenba, iani bidingo ua kemako bi·na nanga ine dabiangaha.
“PA Sangma sagini kosako iandake matnangahani gimin anga Garo Hills-o NPP-ni pal, Manipur a·dokni gitcham Chief Minister N Biren Singh-ko raken jegalenga aro uko kema bi·china dabienga,” ine Marak aganaha.
“Manipur a·dokni gitcham Chief Minister N Biren Singh, an·tangan Manipur a·doko so·sojengjeng ong·aniko ra·baaha ine darangan ma·sia indiba da·o ua iana a·gilsakko watanggimin PA Sangma sagikosa matnangskaenga. Ian namen ra·chakna man·gijani ong·a. Chinga iako raken jegalenga aro uko kema bi·china dabienga,” ineba Marak aganaha.
PA Sangma sagi saksa kakketgipa aro mikkim gnanggipa dilgipasa ong·achim ineba NPP-ni dilgipa aganaha.
“Ua (Purno) saksa a·songni dilgipa ong·e, salgro salaram jolni manderangna aro a·dok ge·antinan dangdike on·gipasa ong·achim. Uni miksonganian pilakkon ku·cholsan ong·atanisa ong·a aro bak dakna miksongani dongja,” ine Marak aganaha.
“Changsao PA Sangma sagi, jatrango pangchake, salgro salaram jolko chonchongipa a·dokrangona pe·na gita ku·rang on·ahachim aro ian an·chingni a·songo ku·mong nangrimanina kenchakna nangani ong·a. Da·alo an·ching apsan daken Manipur-o ong·enggipa obostarangko nikenga,” ine adita salrangna skangsan Manipur-ni gitcham Chief Minister N Biren Singh, X social media-o Lok Sabha-ni gitcham Speaker PA Sangma-ko matnange seatahachim.
Uni iandake PA Sangma sagiko matnangatani ja·man, gitcham Union Minister aro Lok Sabha-ni gitcham Speaker Purno A Sangma, salgro salaramni manderangna pangnan dakgrikgipasa ong·achim ine uni depante aro Meghalaya Chief Minister Conrad K Sangma-ba aganchakaniko on·atskaaha.
“PA Sangma sagini bimingko ong·gija dake N Biren Singh-ni ra·aniara namen kragijani ong·aha, maina PA Sangma sagide salgro salaram a·dokrango songdongenggipa manderangna ku·rang on·gipa aro pangnan manderangni bilko warachakna jotton ka·gipasa ong·achim. Iandakmiting somoio pilakan Manipur a·doko ong·enggipa obostarangko namatnasa kamko ka·na nangenga indiba iandake saksa sakgipinko matnanggrike dongani somoi ong·ja,” ine N Biren Singh-ni PA Sangma-ko matnange social media-o seatani gimin a·dokni Chief Minister Conrad K Sangma parakatskaaha.
