SHILLONG: Meghalaya a·dokni dingtang dingtang biaprangona rel ramarangko taribana gita cholrangko sandina a·dok sorkarini committee-ko songe on·angani ja·man, a·doko Inner Line Permit (ILP)-ko ra·gatani bidingo ma·mong sorkari baksa agangrikchengchina a·dokni Governor CH Vijayashankar-ko Khasi Students Union (KSU) didiataha.
Meghalaya a·dokni dingtang dingtang biaprango rel ramarangko tariani bidingo kamrangko nipilna gita a·dok sorkari, dingtangmancha committee-ko songe donangahachim.
A·dokni Chief Secretary DP Wahlang-ni seachi u·iatani gitade, ia committee-ni kamara, rel ramarangko taribana gita cholrangko sandiani, korosrangko hisapani aro rel garirangko ra·baani bidingo dingtang dingtang dolrang baksa agangrike, a·dok sorkarina report-ko on·anian ong·engachim.
Ia committee-o pilak political dolni dilgiparangba bak ong·gen aro ia committee-ko Chief Minister ba uni songe on·gipa minister saksachi dilanggen ineba Chief Secretary u·iataha.
Ia committee-o membor ong·na gita dilgipa sakgnini biming on·atchina pilak political dolrangkon mol·molataha ineba Chief Secretary u·iataha.
Ia committee-ni chanchirimanirango bak ra·na gita ia kamo nangchakegipa pilak sorkari department-rangkon okamgen ineba u·iataha.
Indake ong·engon, a·dokni Governor CH Vijayashankar, Meghalaya a·dokni namgnina chanchibebegipa mande ong·genchimode, ILP-ko ra·gatani bidingo ma·mong sorkari baksa agangrikchengna nanggen ine KSU parakatskaaha.
“A·dokni Governor, a·dokni namgnina chanchibebegipa mande ong·ode, ILP-ko ra·gatani bidingo ma·mong sorkari baksa agangrikchengchina, unosa chinga rel garirangni bidingo agangrikna man·gen,” ine KSU-ni president Lamborstar Marngar parakataha.
ILP-ko ra·gatchenggijade KSU maming dakeba rel garirangko ra·baani bidingo agangrikna man·jawa ineba ua aganaha.
“Meghalaya a·doko niam gri napsrukanirangko champengna maming niamrang dongjani gimin chinga ILP-ko nangnikchengenga. Iako a·dok aro ma·mong sorkarirang jako ra·gen ine chinga ka·donga,” ine KSU president aganaha.
