Nongpoh: Meja Sukrobar walo Lum Umpih, Umsning Bypass-o National Highway 6 ramao gari a·sel ong·ao Nongpoh Civil Hospital-o kam ka·gipa saksa nurse siaha. Uni gadogipa gari, ML 10C 0234 trak garini rear-o chatingaha.
Walni 11 bajimango ia a·sel ong·aha. Sianggipa me·chik Ri Bhoi Umbir Lawsyiem songoni bilsi 25 ong·gipa Phyllashisha Lynser ong·achim. Ua registration number OR o2AG 7804-ni Alto gario songreengachim, gariko bilsi 27 ong·gipa Chirub L Nonglait minggipa salachim, uan East Khasi Hills Iewrynghep songoni ong·skaa.
A·sel ong·ao gari salgipa aro gario asonggipa sakgnian gari ning·o jachangaha. Chongipa Alto gari trak gariko su·gakeaha. A·sel ong·ako nikgiparang gari salgipako ta·raken Umsning CHC-ona sanna ra·angaha. Indiba gario asonggipa nurse-ko jachanggipa garioniko salongkatna man·ningjaha. Ru·utani ja·man Umsning CHC-ona ra·angahachim indiba ua saknaa bilonge siaha.
Sianggipa me·chikni manggisiko Nongpoh Civil Hospital-ni manggisirangko dongipaona jitataha. Saknaa man·gipa driver ba gari salgipako nambate sanna gita Shillong Civil Hospital-ona wataha.
