TURA: Re·anggipa April-ni 12 tarik Sonibar salo, Tura-ni Rider-rang, chong·motan Tura Enfield Riders Club (TERC), A·kawe MC, TNR West, Black Falcons MC, Queens of Mongols aro Bleed Blue Crusaders MC, Sanchonggre Freedom Life Center Orphanage Home-ona re·angenba, ia bilsini Secondary School Leaving Certificate (SSLC) porikkao chu·sokanggipa chatro chatrirangna mande ra·pilskaanirangko dakangaha.
Ia bilsini SSLC porikkako see pass ka·anggipa ia Orphanage Home-ni chatro chatrirangara, Tra Chename Ch. Momin, Te Wasan Bimik Ch. Momin, Te Peter R. Marak, Te Salgamrik S. Momin aro Tra Minitha W. Momin ong·a.
Ia chatro chatrirangna mande ra·pilskaaniko dakanio Tura-ni Rider-rang, dingtangmancha chatro chatrirangna bi·chakanirangko dake, namgipa skanirangko on·e aro agan-ku·pattianirangkoba on·e donbaaha.
Ia chatro chatrirangna Tura-ni Rider-rang, an·tangtangni bil ama gita tangka paisarangkoba on·gilbaaha.
