TURA: Ia bilsini Secondary School Leaving Certificate (SSLC) porikkao pass ka·gipa chatro chatrirang bang·batahani gimin jolo poraienggipa chatro chatrirangna biaprangko on·na man·na gita North Garo Hills a·jani Mendal Don Bosco School-o morning aro evening shift-koba kulichina Garo Students Union (GSU) Mendal regional unit, a·dokni Education Minister Rakkam A Sangma-na sedoataha.
GSU Mendal regional unit-ni Education Minister-na sedoatgipa chittio parakatani gitade, ia bilsini SSLC porikkako bang·a chatro chatrirangan pass ka·na man·tokahaoba, skul aro college-rango biaprangko man·jae, chatro chatrirang neng·nikanirangko chagrongna nangtokenga.
“Ia jolo poraienggipa chatro chatrirang bang·batan cholgri ong·pagipa nokdangrangonisa ong·e gipin biaprango admission ra·na cholrang dongtokjaenga. Uni gimin ia jolo poraienggipa chatro chatrirangni namgnina, Mendal Don Bosco School-o morning aro evening shift-rangkoba kulie, SSLC porikkako pass ka·gipa chatro chatrirangna biaprangko tikatchina chinga mol·molenga,” ine GSU Mendal regional unit parakataha.
North Garo Hills a·jani Mendal jolrango higher secondary aro college-rang chu·onga gita dongjani a·sel chatro chatrirang, Mendal Don Bosco School-on admission ra·na nangao ga·akenga indiba ia skulo chu·onga gita biaprangko on·na man·jaengani a·sel chatro chatrirang neng·nikanirangko chagrongna nangtokenga ineba GSU Mendal unit-ni dilgiparang parakataha.
“Iani bidingo chinga, Mendal Don Bosco School-ni principal-koba gronge agangrikeaha aro ua an·tangba Education department-oni on·genchimode, morning aro evening class-rangko a·bachengatna kusi ong·enga. Uni gimin chatro chatrirangni namgnina Mendal Don Bosco School-o morning aro evening class-rangko a·bachengna on·china chinga nang·ko mol·molenga,” ine GSU Mendal regional unit parakataha.
 |
ReplyForward
|
