Garo Hills-o ga·akgipa biapko Khasi Hills-o napdraatenganina GES-ba jegala

TURA: East Garo Hills a·jani Mangsang jolo donggipa Morongga songni mitam biaprangko Khasi Hills-o napdraatna jotton ka·enga ine Garo Enlightenment Society (GES) dolba matnangataha aro iani bidingo ta·raken ja·kurangko de·china sorkariko didiataha.
GES dolni u·iatani gitade, ia songni mitam biaprangko Khasi Hills-o napdraatna jotton ka·enga ine koborko man·soani ja·man uamangba, re·anggipa Mongolbar salo, Morongga songona re·ange, songni dilgiparango che·em che·em sing·sandie re·baaha.
“Chingni ma·sibaani gitade ia Morongga, Rengka aro Dobil songgital gimikan A·chik a·king ning·on napa, maina ia sima arirangko 1927 bilsio Mozader J.M David survey ka·na re·baaha aro uko Losker Malai sagi survey ka·anio dakchakaha. Indaken 1933 bilsio interim body-ko songe ia a·arangko chu·gimik sima ari songna aro tarina bon·kame nina gita watataha indaken ua a·arangoni mitamko Khasi Hills aro mitamko Garo Hills ine ma·ekate on·aha. Ma·ekate on·gimin chinrang da·oba Dobil songgital rama chiringo kima ba rongdot dotgittam songanirang gnang ine sakkirangko manbaaha. Indake ong·genchimoba ia biaprangko Khasi Hills-ni ning·o ga·aka a·kangdraaniara ra·chakna amgijani ong·a aro uamangko iandake a·kangdraenba KHADC-ni dingtang dingtang niamo pangchake sinjetanirangkoba on·enga ine uamang chingna aganataha,” ine GES-ni dilgiparang parakataha.
GES-ni parakatani gitade, gue pangsao bite grina gong 5 aro bite gnangna pangsao gong 15 kajina baksama a·a dongchakani kajina aro sal·a bagan damprakna dona bate gilna lekkarang watate basakoba police-rangko watatenga ineba songni manderang, uamangna parakataha.
“Morongga Rengka songrang Rongjeng C&RD Block-ni ning·o ong·genchimoba uamangna dingtang dingtang facility-rangko Block-ni gita chamatanirang dongjaenga MGNREGA scheme na agre, PMAY, JJM, BPL, PMGSY scheme rangko uamang bang·a bilsirangna man·pana jotton ka·genchimoba da·alonaba uandakgipa scheme-rangko man·pakujaenga,” ineba GES-ni dilgiparang parakataha.
Ia pilak neng·nikanirangko sorkarini ning·o kam kaenggipa dingtang dingtang officer-rang jekai C&RD Block Officer, East Garo Hills-ni Deputy Commissioner, Local MLA, MDC-rangko ta·raken nirokatchina gitaba GES, jolo songdongenggipa manderangni pal mol·molataha.