TURA: Meghalaya a·dokona, mongsongbate Garo Hills-ona niam gri napsrukbae songdong a·chaenggipa Pakistan aro Bangladesh a·songni manderangko, a·songtangtangona watpilatna man·na gita bilakbate sandirokchina Tura-ni MDC aro Bharatiya Janata Party (BJP)-ni state vice president Bernard N Marak, a·dok sorkari aro Garo Hills Autonomous District Council (GHADC)-ko didiataha.
“Batanggimin ru·uta bilsirangonin salgro salaram jolrango, mongsongbate Garo Hills-o manderangni jelbra jelsuanio ta·rakaniko nikna man·aha aro ian East Pakistan ba da·o Bangladesh ong·enggipa a·songoni niam gri napsrukani a·selan ong·aha. Ia manderang bang·an Garo Hills-ni a·kawe jolrango aro a·brirangoba songdong a·chatokaha aro iani a·selsa Garo Hills-o inditan manderang jelbar jelsubaaha,” ine Marak parakataha.
Batanggimin somoirango gitcham sorkarirang, mongsongbate Congress sorkarini somoirango, iandake niam gri napsrukanirangko champengna aro am·sandina gita maming ja·ku de·anirang dongjahani a·sel Garo Hills-o hajalni hajal manderang da·o niam gri songdong a·chatokna man·aha ine janapatengon, iani a·sel da·o Garo Hills-o Tribalrang, an·tangtangni bagan barirangko gimaatna nangengaha, gipin jatrangko jikse ra·anirang ong·aha aro jatni on·gimin bilo pangchake, an·tangtangni man·gnirangko gimaatna nangaha ine Tura MDC parakataha.
Electoral roll aro land record-rangko name rakkianichi jolni Tribal jatrangko chel·chakna nangengani gimin janapatengon, Garo Hills-o, mongsongbate sima jolrango donggipa biaprango, niam gri biming segataniko rim·na man·na gita Aadhar-ko Election Photo Identity Card (EPIC) baksa link ka·china Marak didiataha.
Niam gri napsrukanirangko champengna gita a·song damgnini simarango manderangni re·ruraanirangko nambate nirokchina gitaba Marak, a·dok aro ma·mong sorkarirangko didiataha.
Sorkarini kamrango, kamrangko on·anio aro a·ani nokgipa ong·anio Tribal-rangna on·gimin bilko chel·chakchina didiatskaengon, Garo Hills-o songdongenggipa Tribal aro Tribal ong·gijagipa manderangkoba, iandake gipin biaprangoni napsrukaniko champenganio ku·cholsan ong·e bakrimchina Marak didiataha.
“Ian torom ba jatni gimin ong·ja indiba niam gri gipin a·songrangoni napsruke songdong a·chaaniko champenganisa ong·enga. Gipin a·songrangoni niam gri re·napbae songdong a·chaaniara jolni manderangna kenchakna nanganisan ong·aigija pilakni gitan gimaaniba ong·enga,” ine Tura MDC parakataha.
“Pakistan-ni manderangde an·tangtangko Pakistan-ni ine aganjawa, an·chingsa uamangko am·sandie, a·songtangtangona watpilatna nanggen,” ine Marak parakataha.
 |
ReplyForward
|
