SHILLONG: Meghalaya a·doko bijoliko da·o chu·onga gitan on·na man·engaha ine a·dok sorkari a·kangengon, Garo Hills-o, mongsongbate a·kawe jolrango bijoliko man·jaengani a·sel neng·nikanirangko chagrongna nangtokengani gimin a·dokni Opposition dol, a·dok sorkariko matnangatskaaha.
Iani bidingo kobor ra·timgiparangna talate on·angengon, “Ian angni constituency-mangmangosan ong·enga ong·ja. Oe beben anga Jilla jolrangni giminde ma·sipaja indiba Garo Hills-ni a·kawe jol gimikon manderang, bijoliko man·jae neng·nikanirangko chagrongna nangtokenga. Ia jolrango basakobade salbongana, basakobarangde saldokna aro basakobade una bateba manderang bijoliko man·gija dongna nangenga. Iani a·sel manderang namen neng·nikanirangko chagrongna nangtokenga,” ine Rajabala-ni TMC MLA Dr Mizanur Rahman Kazi parakataha.
Dr Kazi-ni aganani gitade, salon baditaba changrang bijoli sirongani a·sel manderang neng·nikanirangko chagrongna nangenga. “Game ge·e cha·giparang, an·tangtangni gama ge·anirangna chirangko watna man·jaenga, chatro chatrirang andaosa poraina nangenga aro chonchongipa karkanarangde bijoli dongjani a·selo chipe dontokna nangpilenga,” ine Dr Kazi aganaha.
A·kawe jol gimikon bijoliko name man·tokjaenga indiba uni constituency-an namjabatenga ineba Rajabala MLA parakataha.
Iani bidingo changni chang district administration aro a·dokni Power Minister AT Mondal-na u·iatahaoba maming ja·kurangko de·chipjani a·selan dingtangani dongja ineba ua aganaha.
“Ia neng·nikanirangko namate on·gnok ine ua (Power Minister) angna ku·rachakaniko on·ahachim indiba da·alonan ia neng·nikanirangko namatchipkujaenga aro manderang namen neng·nikanirangko chagrongna nangtokengaha,” ine Rajabala MLA parakataha.
Adita salrangna skang ong·atanggipa Budget Session-ni somoiosan a·dokni Power Minister, bijoli chu·ongahani gimin load shedding ka·na nangjawa ine ku·rachakaniko on·ahachim ine gisik ra·atpilaniko on·angengon, “Ua bang·en ku·rachakanirangko on·ronga indiba kamrangde dongja. Haida jillarangode obostarang namkalengnaba gnang indiba songadam nokadamrangode maming dingtanganikon nikchipkuja. Salantian baditaba changde bijoli sina nangtelaia,” ine Dr Kazi aganaha.
Manderangni namgnina ia neng·nikanirangko ta·raken namatchina gitaba Dr Kazi, a·dokni Power Minister aro Phulbari MLA AT Mondal-ko mol·molataha.
