TURA: Gipin biaprangoni Tribal ong·gijagipa contractor-rang, Garo Hills-ona re·bae kam ka·tokengani gimin ian Sixth Schedule-ni ning·o jat aro a·songko chel·chakanio niamko pe·ani gita ong·enga ine iani bidingo ta·raken ja·kurangko de·china A·chik Holistic Awakening Movement (AHAM), a·dok sorkari aro Garo Hills Autonomous District Council (GHADC)-ko didiataha.
AHAM-ni president George Prince Ch Momin-ni parakatani gitade, Garo Hills-ara gipin biaprang gita ramram biapsan ong·aija indiba Sixth Schedule-ni ning·o chel·chakako man·gipa biap ong·a aro Meghalaya Transfer of Land (Regulation) Act 1971-ni ning·o on·gimin niamrangba dongani gimin gipin biaprangoni Tribal ong·gijagipa manderang skatang re·bae kamrangko ka·na bil dongjachim.
“Indake ong·genchimoba ia sal somoirango, Assam, West Bengal, Bihar aro uandakgipa dingtang dingtang biaprangoni Tribal ong·gijagipa manderang, Garo Hills-ona re·bae, nok rikani, rama tariani aro uandakgipa dingtang dingtang kamrangko ka·na cholko man·enga. Ian Sixth Schedule-ni ning·o Tribal-rangna aro Tribal-rangni biaprangko chel·chakna on·gimin niamrangko pe·ani ong·enga,” ine Momin parakataha.
Sixth Schedule-ni ning·o District Council-rangan bading chiwalani, a·a ra·ani aro dingtang dingtang kamrangko nirokna gita bil man·gipa bimang ong·achim ine janapatengon, Tribal-rangni man·na nanggipa kamrangko gipin biaprangoni re·baenggipa gipin jatrangnasa on·engani a·sel ia niamrangko pe·a ga·akenga ine AYWO-ni president parakataha.
Momin-ni parakatani gitade, bang·a somoirangon dingtang dingtang kamrangko ka·anio jolni contractor-rangkode bimingnasan jakkalaia indiba kamrangkode gipin jatrangsa man·e cha·enga aro ian Sixth Schedule ning·o Tribal-rangna on·gimin bilrangko pe·ani gita ong·enga.