SHILLONG: India aro Pakistan a·songni gisepo so·sojengjeng ong·anirang batroroengani gimin Bangladesh a·song baksa nangchapgipa Meghalaya a·dokni simarangoba wal 8:00 bajioni pring 6:00 bajiona Night Curfew-ko sorkari ra·gatangaha.
Sorkarini u·iatani gitade, India aro Pakistan a·songni gisepo so·sojengjeng ong·engani gimin ia cholko ra·e Bangladesh a·songoniba ong·gija dakgipa manderang, jekai bobil dake chakatgipa manderang, niam gri badingsrukgiparang aro gipinrangba, sima jolrang gita napdrabae so·sojengjeng ong·atani kamrangko ka·ani cholrang donga ine kenchakenba, ia sima jolrango manderang skatang re·rurana man·jana gita walni somoio curfew-ko ra·gatangaha.
Walni somoio curfew-ko ra·gatahani gimin a·song damgnini sima gita gipin biaprangona re·anganiko aro India a·songona napbaanikoba sorkari champengataha.
Una agreba, curfew-ni somoirango jinma re·jomani, sakbonga ba una bate tom·ani, silchidarerangko ra·bitani, matchu badingani, gue, pan, na·kam aro uandakgipa ma·manti bosturangko ia sima jolrango badingna man·jawa ine sorkari ge·etaniko on·angaha.
East Khasi Hills a·jani simarango night curfew-ko wal 8:00 bajioni pring 6:00 bajiona, Zero Line (Internatiional Border)-oni kilometer-sa ning·o, East Jaintia Hills a·jaoba apsan somoirangon International Border-oni metre 500 ning·aona, West Jaintia Hills a·jaoba apsan somoion Zero Line-oni metre 200 ning·ona, South Garo Hills-oba apsan somoion Zero Line-oni metre 500 ning·aona aro South West Garo Hills-oba apsan somoion Zero Line-oni metre 200 ning·aona ra·gatangaha ine sorkari u·iataha.
