SHILLONG: Meli-nangrimaniko mesokna Meghalaya-ni Governor C.H Vijayashankar, a·dokoni All Faith ba gimik toromni memborrangko apsan ong·china mol·molaha.
Shillong-ni Raj Bhavan-o tom·aniko ong·ataha. Jeon dingtang dingtang toromni organisation-ni representative-rang bakko ra·aha. Meghalaya All Faiths Forum-ni vice president aro Central Pooja Committee, Shillong-ni president Shri Nabha Bhattacharya Garo Baptist Church-ni Pastor Rev. Ellizer N Sangma, Presbyterian Church Shillong-ni Rev GPL Gadew, Seng Khasi-ni Membor Ganesh Dkhar, Meghalaya Muslim Forum-ni president Sayidullah Nongrum, Seinraij Shillong-ni general secretary Dr. Shngain Pyrbot, Archbishop Victor Lyngdohthe-ni palo Catholic Community-ni Father Staibok Warjri, Khasi aro Jainita Hills-ni Presbyterian Church, Garo Baptist Church, Ramkrishna Mission aro Shillong Archdiocese-ni representative-rang bakko ra·angaha.
Tom·anio Chief Minister Conrad Sangma-ba Deputy Chief Minister baksa Delhi-oni online gita bak ra·ataha.
Tom·anio aganprakmitingo Meghalaya-ni Chief Secretary Donald Wahlang, ia somoio an·chingni unity ba saksa sakgipin baksa meli-nangrimaniko mesokna nanga, toromna skang a·song skanggipa ong·a ine aganaha.
India a·songara songdonggiparang pilak manderangni ong·a, an·chingni dakchakanichi sorkari, miksongako chu·sokatna man·gen ine janapte Education Minister Rakkam A Sangma, a·songni armed force ba chelchakgipa dolna bi·chakchina mol·molaha. A·songo bobil dolrangna biap dongja ine Power Minister AT. Mondal aganskaha.
All Faith-ni membor aro official-rang bobil dolni Pahalgam-o chadrapaniko jegalaha aro bobil dolrangni infrastructure-ni nisan ra·e Indian Armed Froces-ni ‘Operation Sindoor’-ko chadrapanina chakpaaniko on·aha.
Iarangni gisepon Governor, tanggitik tom·aniko okamaniona bak ra·na sokani gimin gimikkon mittelaha. Aro toromni gita dilgiparangni bobil dolni chadrapaniko jegalanina de·mittelaha. Indake pilak manderangkon torom aro daka rikani bewalrangko nichenggija a·songko skang donchina aro tom·tomaniko rakkina mol·molangaha.
Meghalaya-o tom·tomaniko rakkina nangnika niam-ritirangko ja·rikenga, iandakgipa somoio an·ching gimikan apsan ong·e chadenga ine Governor ku·mongaha.
Indake toromni dilgiparang, ma·mong sorkarina chakpana ku·chakaha. Unbaksana chadrapao sianggiparangko mande ra·na minit gni somoina jrip mitip dake bi·aniko dakaha.
