SHILLONG: Meghalaya a·dokni chatro chatrirang, Common University Entrance Test (CUET)-ko gipin a·dokrangosa sena nange neng·nikanirangko chagrongna nangtokengani gimin, a·dokni chatro chatrirangna a·doktangon CUET centre-rangko on·na gita National Testing Agency (NTA)-na ge·etaniko on·china a·dokni Chief Minister Conrad K Sangma, Union Education Minister Dharmendra Pradhan-ko mol·molangaha.
Iani bidingo a·dokni Chief Minister, Robibar salo Union Education Minister-ko New Delhi-o grongenba, dingtangmancha memorandum-koba on·angjolaha.
Meghalaya a·dokni chatro chatrirangna a·doktangon CUET centre-rangko on·china didiatengon, “2025 bilsini CUET (UG)-na centre sualaniko nipiltaienba, Meghalaya a·dokni chatro chatrirangna a·doktangon CUET centre-rangko on·na gita NTA-na ge·etaniko on·china anga nang·ko mol·molenga. A·dokni chatro chatrirangna CUET centre-rangko a·doktango suale on·na man·kujaskal porikkako ra·doatkuchina gitaba anga mol·molenga. Meghalaya a·dokni chadamberang, gipin a·dokrangosa CUET-ko sena nangengani a·sel neng·nikanirangko chagrongna nangengani gimin anga iako mol·molenga aro anga bebera·a, iako nang·ni office, chu·sokate on·gen,” ine Sangma, Union Education Minister-na sedoatgipa chittio janapataha.
Ia 2025 bilsini CUET (UG)-ko a·doktango sena man·jaengani gimin aro gipin a·dokrangosa sena nangengani gimin ian a·dokni chatro chatrirangna aro uamangni ma·a paarangna neng·nikanirangko ra·baani gita ong·enga ineba Chief Minister parakataha.
Chief Minister-ni parakatani gitade, Meghalaya a·dokni CUET centre-rango sena dorgasto galgipa bang·bata chatro chatrirangkon ia bilsini CUET-ko sena gita Jorhat, Dibrugarh, Mizoram, Nagaland aro Kolkata-rangosa biaprangko tikatahani a·sel chatro chatrirang neng·nikanirangko man·tokengachim.
Iandake CUET porikkako sena gipin a·dokrango centre-rangko tikataniara chatro chatrirangna, mongsongbate cholgri ong·pagipa nokdangrangna re·a doani aro donge porikkako seanio namen neng·beani ong·enga ineba Sangma parakataha.