TURA: Phulbari police station-ni ning·o donggipa Gomaijhora song samba jolrango ro·ong jetani dambri karkanarangko niam gri chalaienga ine Fight Against Corruption (FAC) minggipa dol, Garo Hills Autonomous District Council (GHADC)-ni Phulbari Range-o badi ka·doangaha.
Iani bidingo Phulbari Range-ni official-rangna badi ka·doangengon, ia ro·ong jetani karkanarangko Bawilgre, Balujhora aro Malijhora songrango, GHADC-oniko permit ra·chenggija chalaienga ine FAC parakataha.
FAC-ni parakatani gitade, ia ro·ong jetani karkanarangko Muzzafar Hoque, Nurul Islam, Asraff Sheikh aro Minal Sheikh minggipa manderang niam gri chalaienga aro ia manderangara pilakan Phulbari samba jolrangonin ong·a.
“Ia manderang, sorkarioniko aro district council-oniko permission ra·chenggijasa ia ro·ong jetani karkanarangko chalaienga aro ia manderangna mitam dolrangba chakpaanirangko on·enga. Ia jolrango iandake ro·ong jetani karkanarangko niam gri chalaiengani a·selan samtangtango ong·telaigiparangna nangchakeaniko ra·baenga,” ine FAC-ni president Waliul Islam parakataha.
Ia ro·ong jetani karkanarangko chalaianio ia manderang, jolo donggipa buring bolgrimni bolrangkoba bang·en den·aha ineba FAC parakataha.
“Ia ro·ong jetani karkanarangko chalaina gita uamang permission-koba ra·ja aro songni manderangba uamangko champengtokahachim indiba uamang da·alonan ia quarry-rangko niam gri chalaienga. Ian bilo ong·enggipa manderangni dakchakani giminsa ong·enga aro uamang ia quarry-rangko bil jak mesokesa chalaienga,” ine Islam parakataha.
Ia ro·ong jetani karkanarangko ta·raken chipatchina gitaba FAC, GHADC-ni official-rangko didiataha.