SHILLONG: Je college-rangan a·doktangni Captain Williamson Sangma State University-o bak ong·na sikengachim, uandakgipa college-rangde North Eastern Hill University (NEHU)-o bak ong·aniko watchengna nanggen ine Bristibar salo a·dok sorkari talataniko on·angaha.
Iani bidingo kobor ra·timgipa manderang baksa agangrikengon, je college-rangan gipin state University-rangni ning·o ong·na sikengachim, uandakgipa college-rangde NEHU-o bak ong·aniko watchengna nanggen ine NEHU Act-o janapani donga aro ia niamko ja·rikna nanggen ine a·dokni Education Minister Rakkam A Sangma parakataha.
Education Minister-ni parakatani gitade, a·dok sorkari aro NEHU-ni official-rangba tom·e chanchirimangaha, jeon gipin state University-o bak ong·na sikenggipa college-rangde NEHU-o bak ong·aniko watchengna nanggen ine tik ka·angaha.
A·dok sorkarini State University-ode bang·gija department-rangsan dongaigen ine chanchichiptokengani gimin sing·on, NEHU-koba 1973 bilsio department ge·gnichisan a·bachengaha indiba da·o Captain Williamson Sangma State University-kode ge 15 department-rangchi a·bachengenga ine Sangma parakataha.
College-rang NEHU-o bak ong·aniko watenba skanggipa semester-nade gital University-o bak ong·na man·gen aro ia college-rangko course matchotkujaskal NEHU-onin chu·gimik semester-rangko matchotna on·aigen ineba Education Minister aganaha.
Sangma-ni aganani gitade, re·anggipa bilsio RIST-ni NEHU-o bak ong·aniko wate skanggipa semester-na USTM-o bak ong·anioba apsan niamkon ja·rikaha aro uamangkoba course matchotkujaskal, NEHU-on chu·gimik semester-ko matchotna on·aiaha.
A·dokni dam 22 college-rang, a·dokni State University-o bak ong·na sikenga ine Education Minister-ni aganani ja·man dolgnini gisepo adita meligrikgijanirang ong·katahachim. Uni iandake parakatani ja·man, college-rang University damgnio bak ong·na man·jawa ine NEHU talataniko on·angskaaha.