TURA: Adita salrangna skang, South West Garo Hills a·jao Ayush Medical Officer aro Yoga Instructor-ni kamna manderangko seokanio Tribal-rangonide saksaba kam man·rikgija kam gimikkon Tribal ong·gijagipa candidate-rangnasa on·aha ine Garo Students Union (GSU) Western Zone (South) Ampati, suk ong·gijaniko parakatenba, ia kamrangna ra·aniko gital dake nipiltaichina didiataha.
Iani bidingo, South West Garo Hills a·jani Deputy Commissioner-na badi ka·e sedoatengon, Ampati-o Ayush Medical Officer-ni kamna sakdok aro Yoga Instructor saksako seokanio, Scheduled Tribe (ST) category-onide saksaba kam man·rikjaha aro kam gimikkon gipin category-ni candidate-rangnasa on·gopaha ine GSU Ampati-ni president Megadeth Mrong Marak, an·tangni suk ong·gijaniko parakatenba, iani bidingo ta·raken nipiltaienba porikkarangko ra·taipilchina didiataha.
“Ia kamrangna interview ra·gipa Khasi (ST) candidate-rangba adita sak dongachim ine chinga koborko man·soaha indiba kamrangko ST candidate-rangnade on·gija kam gimikkon gipin category-ni candidate-rangnasa on·aha. Tribal candidate-rangna dongimin kamrangko maikai ST category-o ga·akgijagipa candidate-rangna on·na man·aha?” ine GSU Ampati sing·doataha.
Indake ong·engon, iani bidingo ta·raken sandirokenba, je manderangkon kamna seokahachim, ua pilakkon den·galpilchina aro Reservation Policy-o pangchake porikkarangko ra·piltaichina GSU didiataha.
Iana salsa skangsan AYWO aro ACHIK dolrangba, iani bidingo raken jegalataha aro kam on·aniko dontongatpilchina dabiangtokaha.
Iani bidingo SWGH a·jani Deputy Commissioner an·tangba suk ong·gijaniko parakataha aro iani bidingo Ayush society-ni gipin membor-rang aro DMHO baksa chanchirimenba report-ko bi·gen ine AYWO-ni dilgiparangna ku·rachakaniko on·ataha.
AYWO-ni parakatani gitade, ia antini gisepo SWGH a·jani Deputy Commissioner, District Ayush Society-ni official-rang baksa tom·e report-ko bi·na ku·rachakaniko on·ataha.
SWGH-o Ayush-ni kamko Tribal-rangoni saksaba man·jani gimin GSU jegala
Date:
Share post:
