TURA: East Garo Hills a·jao lekka porani gita namdaptna nanganirang aro a·ja gimiko matchotgija dongenggipa kamrangni bidingo Garo Students Union (GSU) Williamnagar, a·dokni Chief Minister Conrad K Sangma-na memorandum-ko on·ataha.
Ia bilsini SSLC porikkao bang·bata chatro chatrirangan pass ka·ahani gimin skul aro college-rango biaprangko man·jae neng·nikanirangko chagrongna nangtokengon, SSLC porikkako pass ka·gipa chatro chatri gimiknan admission-ko on·na man·na gita Williamnagar-o donggipa sorkari skul aro college-rango biaprangko bariatchina GSU didiataha.
Williamnagar Govt HS school-ni nokko matchotchipkujaengani gimin ia skul nokko ta·raken matchotatchina aro skulo commerce stream-ko a·bachengatchina gitaba GSU, Chief Minister-na gisik ra·atpiltaianiko on·angaha.
Williamnagar Polytechnic Institute-ko 2018 bilsion nokdonggaahaoba da·onan ia institute-ko chalaikujaengani giminba GSU, sorkariko sing·doataha.
Williamnagar Bus Station-o donggipa Dama chiring dolongko rikanio ru·utengani gimin GSU, a·dok sorkariko sing·doataha.
GSU Williamnagar-ni parakatani gitade, ia dolongko rikna 2024 bilsini December jaon a·bachengahachim indiba da·alonan kamrang 50 percent ong·kujaenga.
Indake ong·engon, ia dolongni bidingo badi ka·anirangko man·soenba Mongolbar salo, a·dokni Chief Minister an·tangan ia dolongko nina re·angaha aro kamrangko nike ua an·tangba suk ong·gijaniko parakaha. Ia kamko ta·raken matchotatchina gitaba contractor-rangko ge·etangaha aro somoi gita matchotjagenchimode contractor-rangni bimingko blacklist ka·na mikrakataniko on·angaha.