SHILLONG: Songsul Assam baksa meligrikgija-gipa sima-arini bidingo da·o agangriknasienggipa-na pilak nanggipa lekkarang baksa agangrikna gita a·dok chu·gimik tarieng-aha, Assam-o political-ni gita Assembly poll-rang sepangenganichi mikkang-chi ta·rake chanchigrikna nangnikenga ine Cabinet Minister aro MDA ku·-wattimgipa, Paul Lyngdoh mejalo aganaha.
Meghalaya Chief Minister Conrad K Sangma aro uni Assam-ni apsan gadangni Himanta Biswa Sarma-ni gisepo sima-arini bidingo gnigipa gadangni dal·begipa agangrikaniko June 2 tariko agangrikna skang ua ia kattarangko aganaha. Meghalaya-Assam sima-ario namatna nangenggipa bangki meligrikgijagipa dam dok biaprangko namatna chanchiani miksongani ong·a.
“Committee-ni report-ko adita somaina tarimanaha,” Assam-ni kachario meligrik-gijagipa biapona a·dok damgni nangrime re·angna mamla dongenga uko chu·sokatna man·kuja-enga, Lyngdoh aganaha. “Uamango panchayat election-rang dongani aro Assembly election-rang ong·nasienganio agangrik-na cholko man·kujaenga ine Assam aganchakaha. Assembly election-rang sepangengaha, election-o maiba dal·a a·sel ong·naba donga kenchake da·o dontongchengenga,”ua aganaha.
Agangrikaniko a·ba-chengna tariako janap-engon election-ni kamrang matchotna skang maming dakeba dal·a a·sel-a·pot-rang ong·ako nangnikjae namedake agan-chanchi-grike sima-arini mamlako matchotatna agangrikaniko champengenga, political-ni gita kamko ka·ani namen dal·begipa ong·a ine ua agandapaha.
Assam-o ru·utgija salo-san May 2 aro 7-o ge 27 district-rango ong·atgipa panchayat election-rang matchotanga, consti-tuency-rangko delimitation ka·anichi indakgipa election-ko skanggipao ong·ataha. Bil-sason ka·enggipa BJP aro ua-mangni bakrimgipa Asom Gana Parishad (AGP) a·dok gimikni dal·dalgipa Zilla Parishad-rang aro Anchalik Panchayat-rang gimikon election-rango amgopaha.
March-oni April-rango ong·atnaba donga ka·-dongsoenggipa ong·nasi-enggipa 2026 Assam Legis-lative election-rangchi apalgipa political obosta bimang pilatenga.
Da·o ong·enggipa Assembly-ko 2021-o ong·ataha 2026 May 2-o assembly-ni term matchot-gnok. Panchayat aro state election-rang namen dal·a, simani bidingo chanchianio Assam gisik nange kamko ka·gen ine Meghalaya official-rang ka·dongenga.
