SHILLONG: Re·anggipa May 23 tarikoni Sohra jolo gimaenggipa tourist sak-gni, chong·motan Madhya Pradesh a·doko donggipa Indore songjinmaoni Raja Raghuvanshi aro Sonam Raghuvanshi-ko da·o dipet man·pilkujaengon, ia mande sakgniko dingtang dingtang dolrang aro songni manderangba, walang salang neng·-takpilgija sanditokenga ine Bristibar salo, a·dokni Chief Minister Conrad K Sangma parakataha.
“Madhya Pradesh-oni re·bae a·dokni Sohra (Cherrapunjee) jolo mande sakgnini gimaaniara namen rasong gri ong·a aro ua-mang gimaenga ine chinga koborrangko man·soaha. Madhya Pradesh a·dokni Chief Minister aro Home Minister-ni office-oniba angna iani bidingo phone ka·ataha. Anga salantian iani bidingo koborko ra·jringenga aro gimagipa manderangko man·pilna rakbee kamrangko ka·-enga,” ine Sangma, kobor ra·timgiparangna aganaha.
Ia a·selni bidingo gital koborrangko on·ang-engon, “SP, district administration, police-rang, gimaenggipa jiksesako salo konta 24-na sandienga. Sorkarini manderangsan ong·ja indiba dingtang dingtang songni mande-rangba ia jiksesako sandia-nio dakchakanirangko on·paenga,” ine Chief Minister parakataha.
“Ia manderangko san-dianio chinga pilak donga technology-rangkode jak-kalenga indiba ian wachini somoi ong·ani kamko ka·anio neng·nikanirangko chagrongna nangenga. Indiba chinga ia sakgniko ta·raken sandina jotton ka·enga,” ineba ua aganaha. Chief Minister-ni aganani gitade, gimaeng-gipa mande sakgniko san-dianio sorkarini mande-rangsan ong·aigija Sohra jolo donggipa pilak songni manderangan bakrimani-rangko on·enga.
“Ia jiksesani para ra·anggipa bike-ko ramao gale donangako man·ahani gimin uamang ramaoni adita diltukalgipa biap-rangona re·angengnaba gnang ine chinko mesokani ong·enga indiba ia biap-rangara da·o gita wachini somoirangode namen ga·nanggijagipa biaprang ong·a,” ine Sangma agan-aha. Biaprang diltugen-chimoba aro ramarang ga·nangjagenchimoba ia mande sakgniko bakan man·naba gnang ine Chief Minister, an·tangni ka·-dongchakenganiko parakataha. Gimaenggipa mande sakgniko sandianio bakrimaniko on·enggipa pilak songni mande-rangkoba Chief Minister mittelpilangaha.
