SHILLONG: Tura-ko Winter Capital songchina dabienggipani bidingo A·chik Conscious Holistically Integrated Krima (ACHIK) dolni dilgiparang, Sombar salo, a·dokni Governor CH Vijayashankar-ko gronge agangrikeaha aro ua ia dabianiko niatna ku·rachakaniko on·ataha.
Iani bidingo kobor ra·timgipa manderang baksa agangrikengon, Tura-ko Winter Capital songchina dabianiara a·dokko man·e on·dilgipa pagitchamrangni nangnikanian ong·a aro ian a·doko darangkoba nichanggalani gri apsan namroro silroroaniko ra·bana nangnike dabianisa ong·enga ine ACHIK-ni general secretary Adam R Sangma parakataha.
Tura-ko Winter Capital songanichi, indita bilsirangna galchipa man·enggipa Garo Hills-ni dingtang dingtang biaprango namroro silroroaniko ra·bana man·gen ineba ua aganaha.
Garo Hills-ara Meghalaya a·dokni skotong Shillong songjinmaoni chel·grikani gimin Shillong aro Tura-ni gisepo Secretariat aro sorkarini kamrangko suale ka·anichi, Garo Hills-o dingtanganiko ra·bana man·gen ineba ACHIK dolni dilgipa parakataha.
Sangma-ni parakatani gitade, Tura-ko Winter Capital songanichi sorkarini kamrangko Tura-ona ra·bae, Garo Hills-o songdongenggipa manderangba pilak kamrangon altubate dakchakanirangko ra·na man·gen aro dingtang dingtang namroro silroroani program-rangonikoba namgnirangko man·gen.
Kobor ra·timgiparangni sing·anina aganchakaniko on·angkuengon, Tura-ko Winter Capital songchina dabienganiko a·dokni Governor niatna ku·rachakaha ine ACHIK dolni dilgipa parakataha.
