TURA: Tura-ko Winter Capital songchina dabienggipani bidingo manderangna talatanirangko on·na gita A·chik State People’s Front (ASPF)-ni chang 13-gipa tom·bimonganiko re·anggipa Budbar salo, East Garo Hills a·jani Mangsang Bamil kal·chakramo ong·atangaha.
Ia tom·aniko Garo Students Union (GSU) Mangsang Regional Unit aro FKGJP Mangsang Regional Unit baksa nangrime ong·ataha aro ia tom·aniko ASPF Williamnagar Town unit-ni adviser Ronal Bryan A Sangma dilangaha.
Rimchaksoani kattarangko GSU Mangsang regional unit-ni president Barnawel R Sangma aganangaha aro ia tom·anio ASPF-ni general secretary Bernita R Marak, GSMC-ni acting chairman Balkarin Ch Marak, Mangsang jolni laskar Lipingston Sangma aro FKJGP Mangsan regional unit-ni president George D Sangma-ba jinmana aganprakangaha.
Ia tom·anio ASPF-ni general secretary Bernita Marak, jinmana aganprakengon, Tura-ko Winter Capital songaniara Meghalaya a·dokko man·e on·dilanggipa pagitchamrangni ku·rachakgimin kattarangan ong·a aro iani bidingo A·chik a·songni manderangna u·iatna aro ia dabianio bakrimaniko on·china didina gita ASPF, Garo Hills-ni pilak biaprangon awareness program-rangko ong·atenga ine parakataha.
Garo Hills-ni namroro silroroanina Tura-ko Winter Capital songna nangchongmota ine janapatengon, ia dabianio Garo Hills-o songdongenggipa pilak manderangkon bakrimchina gita Marak didiangaha.
Ia dabianio Garo Hills-ni pilak dilgiparangkoba ku·cholsan ong·e bakrimchina gitaba ua didiangaha.
Bon·kamao ASPF Williamnagar Town unit-ni chief organizing secretary Birash Sangma-chi mittelpilani kattarangko aganenba ia tom·aniko matchotataha.
