SHILLONG: Rel project-ni bidingo chanchirimna gita a·dok sorkarini songe on·gipa committee-o Opposition dolrang, chong·motan Voice of the People’s Party (VPP) aro Congress dolrangde bakrimjana tik ka·ahaon, ia committee-o bakrimna gita United Democratic Party (UDP)-de working president Titosstarwell Chyne aro MLA Lahkmen Rymbui-ko songe donangskaaha.
Iani bidingo kobor ra·timgiparangna talataniko on·angengon, rel project-ni bidingo ia committee-na party-ni chanchianirangko u·iatna skang, party-tangni pilak MLA-rang aro dilgiparang baksa apsan chanchirimchenggen ine UDP-ni working president Titosstarwell Chyne parakataha.
A·bachengo party-ni tik ka·gimin gitan, a·doko niam gri napsrukanirangko champengna gita bilakgipa niamrangko ra·gatchenggijade rel garirangko ra·bana on·kujawa ineba ua aganaha.
Uamangni gitcham general secretary Jemino Mawthoh-ni kam watani chittiko ra·chakna gita UDP-ni core committee tik ka·manaha ineba Chyne parakataha.
Re·baenggipa June 27 tariko UDP Central Executive Committee (CEC)-ni tom·aniko ong·atna siengani gimin ia tom·aniona Mawthoh-ni kam watani chittiko ra·anggen ineba UDP-ni working president aganaha.
Chyne-ni aganani gitade, party-ko wate re·anggipa Jemino Mawthoh-ko chanchitaipilchina gita uamang didiahachim indiba ua an·tangni tik ka·giminko ra·pilna jechakaha.
Ru·utbea bilsirangna general secretary ong·e kamko ka·angahani gimin Mawthoh-ko mittelpilangengon, da·o dipet UDP-ni kamrangko chalaidilna gita secretary sakdokoniko saksako acting general secretary dake songchina Chyne, UDP-ni president Metbah Lyngdoh-ko didiataha.
2028 bilsio UDP bilgrignok ine adita salrangna skang, VPP-ni dilgipa Batskhem Myrboh-ni agananikoba ua raken jegalataha.
VPP-ni president Ardent Miller Basaiawmoit an·tangan skangode UDP-ni memborsa ong·achim ine janapatengon, 2028 bilsio UDP bilgrignok ine aganani gimin Chyne, VPP-ni dilgipa Batskhem Myrboh-ko sing·doatskaaha.
UDP-de Meghalaya a·doko gital party ong·ja indiba All Party Hill Leaders Conference (APHLC)-ni somoirangonin nakatbagipasa ong·a ineba ua aganaha.
