TURA: National Highway (NH-62) ramako tarianio somoi gita kamrangko a·bachengja aro kamrang namen ka·sinengani a·sel ramako re·ruraenggipa aro jolo songdongenggipa manderang neng·nikanirangko chagrongna nangtokenga ine ia kamko ka·na gita work order-ko man·gipa M/S Midas Construction aro Niku Saha minggipa contractor-rangni kosako South Garo Hills a·jani social activist Greneth M Sangma, PWD (Roads)-ni Chief Engineer (NH)-na badi ka·doataha.
Sangma-ni PWD official-na badi ka·doangani gitade, kamrangko u·iataniko on·aoni sal 15-ni gisepon a·bachengani ong·achim indiba contractor-rang, ia kamrangko somoi gita a·bachengjaha.
Kamrangba namen ka·sinenga ine badi ka·doangskaengon, kamko ka·enggipa contractor, ia kamna dongimin sokmoiko ja·rikjaenga aro kam ka·giparangkoba chu·onga gita rakkijaenga ine Sangma matnangataha.
Indake ong·engon, ia contractor-rangni kosako, contract-o songgigrikgimin gita dairangko ra·china, dongimin somoio kamrangko name ka·ja ong·ode ia contract-ko den·galpilchina aro kamrangko somoi gita matchotatna ia kamrangna tender-ko on·piltaichina Sangma didiataha.
