TURA: Mijal Sombar pringo, Tura Municipal Board (TMB)-ni jabol rongtalatgiparang, pangna dakrongbewal gita Tura-ni Hawakhana jolo donggipa jabol galchakram biap damsaoniko jabolrangko galengmiting somoio, atchidaldal bi·sa saksani manggisiko man·aha.
Bi·sani manggisiko man·a bakan TMB-ni manderang, police-rangna u·iataha aro police-rang ia a·selni bidingo sandirokna a·bachengataha.
Sandirokaniko dakon, ia bi·sa Tura Maternity & Child Hospital-o sikame atchiaha ine ma·sina man·aha aro ja·man ia bi·sani manggisiko gope galchina bi·sani pagipana ge·etaniko on·ataha.
Police-rangni u·iatani gitade, bi·sa an·pakani ja·man ma·gipakode hospital-on sanengkua.
