So·ota man·gipa Raja Raghuvanshi-na Sohra-o jinma tom·e re·jomaniko ong·ata

SHILLONG: Adita salrangna skang, Madhya Pradesh a·dokoni re·bae so·ota man·gipa Raja Raghuvanshi-na kalimpaaniko mesokna gita Sombar salo Sohra jolrango songdongenggipa manderang, jinma tom·e re·jomaniko ong·atangaha aro ia tom·bimonganio bang·a manderangan bak ra·angtokaha.
Ia tom·bimonge re·jomaniko Hima Sohra ong·atangaha aro ia tom·anio bak ra·giparang, Raja Raghuvanshi-na kalimpaaniko mesokna mombatirangko so·e aro ia a·sel ong·anina Sohra jolrangko aro mongsongbate Meghalaya a·dok gimikko namgijagipa biap ine mitam national media-rango seahani gimin jegale segimin lekka pal·takrangkoba ra·e re·jomangtokaha.
Ia tom·anio Sohra-ni MLA Gavin Miguel Mylliem-ba bak ra·e, jinmana aganprakangengon, ia jolrango skangonin gipin biaprangoni re·bagipa manderangko ka·sae nokchakronga aro nangan somoirango dakchakanirangkoba on·ronga indiba ia a·sel ong·anio Sohra jolni manderangko mande so·otgipa, ra·seke ra·gipa aro mande rim·gittanggiparang ine news channel-rango aro mitam manderangni matnanganiara, songni manderangna dukni aro ka·a ding·chaoaniko ra·baani gita ong·aha ine parakataha.
“Ia biapona re·baenggipa pilak manderangan chingona sokgiparangsa ong·ani gimin chinga pilakkon ka·sae nokchakronga. Ia mandena je a·sel ong·aha ian ia biapo songdongenggipa manderangni a·sel ong·jachim indiba iako name sandichenggija national media-rang, ia jolrango songdongenggipa manderangkosa matnangskaaha, uni gimin chinga iako raken jegala,” ine Mylliem aganaha.
Ia tom·anio Hima Sohra-ni dilgipa saksaba jinmana aganprakangengon, ia a·selni bidingo Sohra jolrango songdongenggipa manderangko matnangahani gimin national media-rangko jegalatenba, konta 24-ni gisepon kema bi·na nanggen ine aganaha.
“Sohra jolrango aro jolo songdongenggipa manderangko je national media-rang aro manderang matnange aganahachim, konta 24-ni gisepon chingo kema bi·na nanggen aro kema bi·jagenchimode chinga FIR ka·gen aro aino pangchake ja·kurangko de·anggen,” ine ua aganaha.
Raja Raghuvanshi-ko so·otanina uni jikgipako man·chape gimik sakbri manderangko da·o police-rang rim·aha aro uamang pilakkon bichal ka·na gita Shillong-ona rimbapilaha.