TURA: Meghalaya a·dokni Rashtriya Madhyamik Shiksha Abhiyan (RMSA) skulrango skigiparangna bilsi 10 batpilengahaoba dormaharangko bariatchipkujaenga ine Mongolbar salo, All Meghalaya RMSA Teachers Association (AMRMSATA)-ni membor-rang, a·dokni Education Minister Rakkam A Sangma-ko grongenba, RMSA skigiparangni dormahako bariatchina didiangaha.
“Government, aided, SSA aro gipin skigiparangnade dormaharangko bariatahaoba chinga RMSA skulrango skigiparangnade bilsi 10 ong·pilengahaoba dormahako bariatchipkujaengani gimin chingni dormaharangkoba bariatchina chinga Education Minister-ko mol·molangaha,” ine association-ni dilgiparang parakataha.
Dingtang dingtang RMSA skulrangko ra·dona gita ge·etaniko on·ani ja·manoba ia kamko bon·chipatengani giminba RMSA skulrango skigiparang, a·dok sorkario sing·doangaha.
“RMSA secondary skulrangko higher secondary-ona ra·dona Education department-ni ge·etgipani giminba chinga Education Minister baksa chanchirimaha. Re·anggipa April jani 4 tariko, Education-ni commissioner & secretary aro director baksana dingtang dingtang dolrang baksa tom·anio, pilak sorkari aro RMSA secondary skulrangko higher secondary gadangona ra·dona aro sorkari baksana RMSA secondary skulrango Science aro Commerce stream-rangkoba ra·gatna resolution-ko pass ka·ahachim,” ine RMSA skigiparang parakataha.
Skigiparangni u·iatani gitade, ia ge·etanio pangchake North Garo Hills a·jani Deputy Commissioner, admission form-rangkoba on·ahachim. Iani bidingo Education Minister niatna gita ku·rachakaniko on·ataha ine skigiparang parakataha.
RMSA skigiparangko regularize ka·ani bidingo agangrikon, pilak skigiparangni namgninan sorkari kamrangko ka·na jotton ka·enga ine Education Minister, skigiparangna ku·rachakaniko on·ataha. Non-teaching staff-ko rakkidapani gimin agangrikon, da·o dipet tangkarang dongjani gimin iako chu·sokatna man·jawa ine Education Minister parakatskaaha.
“Chinga baditaba chang ia neng·nikanirangko sorkarina seachi u·iatahachim indiba da·alonan chu·sokatchipkujaenga. Uni gimin skigiparangni namgnina ia pilak chingni nanganirangko chu·sokate on·china chinga sorkariko mol·molenga,” ine AMRMSATA parakataha.
