AMPATI: South West Garo Hills a·jani Ampati-o rikenggipa Nagrasket Football Turf aro International Stadium-ko Bristibar salo, a·dokni Sports Minister Shakliar Warjri nina re·baaha.
Ia stadium-ko Sports Minister-ni nianganio, South West Garo Hills a·jani Additional Deputy Commissioner Dolrich Berin G Momin, District Sports Officer Saljagring M Marak, SSCM-ni Assistant Engineer aro a·jani gipin official-rangba dongpaaha.
Nagrasket Football Turf-ko niangengon, ia robol kal·chakgipa biapni nosto ong·angengani gimin Sports Minister, suk ong·gijaniko parakenba, ia robol kal·chakgipa biapko ta·raken taridapchina SSCM-ni Engineer-ko ge·etangaha.
Ia taridapgipa kal·chakramo nambate nirokna man·na gita aro manderang jakkalna man·na gita ta·raken District Sports Office-na aro Ampati-ni Football Association-na pakwate on·china Sports Minister ge·etangaha.
Ampati-o rikenggipa International Stadium-ko niangskaengon, stadium-ko rikanio kamrang ka·sinengani gimin aro kamrang namjaengani gimin a·dokni Sports Minister, chu·ongnikgijaniko parakangaha. Kamrangko name nipiltaichina gita SSCM-ko ge·etangengon, bangki kamrangko name aro somoi gita matchotatna bilakbate nirok sandianirangko dakchina Warjri didiangaha.
Ia jolrango kal·susaanio gisik nanggiparangko ra·dona gitade kal·chakram biaprangkoba nambatatna nanga ine Sports Minister aganangaha.
