TURA: Meghalaya State Legal Services Authority (MSLSA)-ni gita Selsella Block-ni ning·o donggipa Nokmarangna, Mediation ba golmal ong·ani somoirango namgrikatna gita dingtangmancha training program-ko Sukrobar salo, West Garo Hills a·jani Selsella Block-o ong·atangaha.
Ia program-ko Department of Justice, Ministry of Law & Justice, Government of Meghalaya Funded Project (Under DISHA Scheme)-ni bak gita ong·atangaha.
Ia training program-ko seoka man·gimin damgni a·jarang, chong·motan West Garo Hills aro Ri Bhoi a·jani ning·o donggipa dam 11 C&RD Block-rango ong·atenga ine nikna man·a.
Ia program-ko ong·atanio, MSLSA-ni official-rang, jinmana aganprakangengon, songo noko golmalrang ong·on ba uandakgipa a·selrangni somoirango Nokmarangsa, iandakgipa kamrangko ka·na nangani gimin ia training program-ko dingtangmancha Nokmarangna ong·atenga ine parakataha.
Iandakgipa kamrangara songni manderangna gital katta ong·ja indiba gisik ra·atanisan ong·aia ine janapatengon, songo noko maiba a·selni gimin golmalrang ong·on, dolgnini gisepo namgrikaniko ra·bana gita dolgni apsan asonge agangrikna nanga aro iani giminsa ia training program-ko songni manderangna aro Nokmarangna ong·atenga ine official-rang aganaha.
Ia training program-o agan-talate on·anggipa manderangara, MSLSA-ni Officer on Special Duty TTM Sangma, MSLSA-ni Coordinator B Syiemlieh, MSLSA-ni Project Coordinator (DoJ Project) P Patam, West Garo Hills District Legal Services Authority-ni Assistant Legal Aid Defense Counsel Jingjang Ch Marak, DLSA-ni Assistant Legal Aid Defense Counsel Grangchira Ch Marak, DLSA-ni Deputy Legal Aid Defense Counsel John Cronin Ch Sangma aro DLSA-ni Assistant Legal Aid Defense Counsel Jericho Ch Marak ong·a.
