SHILLONG: Ru·uta somoirangoni nichakenggipa State Reservation Policy-ni report-ko a·dok sorkari man·soaha aro iani bidingo a·dokni Cabinet, Sukrobar salo adita chanchirimangaha ine a·dokni Cabinet Minister aro MDA-na ku·wattimgipa Paul Lyngdoh parakataha.
“Reservation Policy-ko nipiltaina gita sorkarini songe on·gipa expert committee-ni report-ko a·dok sorkari man·soaha aro ia report-ni giminba da·alo Cabinet adita chanchirimangaha. Ia expert committee-ni pilak membor-rangan gipin biaprangonisa ong·a aro darangnaba mikkang niteani dongjana gita sorkari, ia committee membor-rangko seokaha,” ine Lyngdoh aganaha.
Ian namen bakrobegipa report-ko ong·a aro iako poraie nipilna gita a·dokni Chief Secretary baksana gipin dal·dalgipa official-rangna pakwate on·ataha ineba ua aganaha.
“Expert committee-ni report-ko da·o sorkari man·soahani gimin ia report-ko da·o name che·em che·em nipilna nangenga. Uni gimin ia kamko chinga a·dokni Chief Secretary aro dal·dalgipa official-rangna pakwate on·angaha,” ine Minister aganaha.
Ia report-ko da·o kan·dikatenba chu·gimik man·gope tarigen aro nambate chanchirimna gita Cabinet-ona ra·anggen ineba Lyngdoh parakataha.
“Ian namen bakrobegipa report ong·a aro da·o ia report-ko chu·gimik man·gope bakkandikskagen. Bakkandikgimin report-ko Cabinet-ona ra·anggen aro ia report-ko re·baenggipa September jao ong·atna sienggipa Assembly Session-o chanchirimna ra·anggen,” ine Lyngdoh aganaha.
